Wednesday, 25 November 2020

2019 නව ඡන්ද හිමි නාම ලේඛනයට අනුව ගාල්ල දිස්ත්‍රික්කයට හිමිව තිබූ පාර්ලිමේන්තු මන්ත්‍රී ආසනයක් අඩු වී  ඇත.  එනම් ගාල්ල දිස්ත්‍රික්කයට හිමි පාර්ලිමේන්තු මන්ත්‍රී ආසන 10 ආසන 9 ක් බවට පත්වී ඇත. මෙම අඩුවූ මන්ත්‍රී ධුරය හිමිව ඇත්තේ බදුල්ල දිස්ත්‍රික්යටයි. ඒ අනුව බදුල්ල දිස්ත්‍රික්කයට හිමි පාර්ලිමේන්තු මන්ත්‍රී ආසන සංඛ්‍යාව 8 සිට 9 දක්වා වැඩි වී තිබේ. ඡන්දය හිමි නාමලේඛනයක්  සංශෝධනය වනවිට ඒ ඒ දිස්ත්‍රික්කයට හිමි ඡන්ද දායකයින් සංඛ්‍යාවේ ප්‍රතිශතය මත පාර්ලිමේන්තු මන්ත්‍රී ධූර සංඛ්‍යාව තීරණය වේ.

2015 පැවති අවසන් පාර්ලිමේන්තු මැතිවරණයේ දී ගාල්ල දිස්ත්‍රික්කය වෙනුවෙන් එක්සත් ජනතා නිදහස් සන්ධානයට මන්ත්‍රී ධුර 6ක් සහ එක්සත් ජාතික පක්ෂයට මන්ත්‍රී ධුර 4ක් හිමිව තිබුණි. බදුල්ල දිස්ත්‍රික්ක අවසන් ප්‍රතිඵලය වූයේ එක්සත් ජාතික පක්ෂයට මන්ත්‍රී ධුර 5ක් සහ එක්සත් ජනතා නිදහස් සන්ධානයට 3ක් වශයෙනි.

 

ශ්‍රී ලංකා වරාය අධිකාරියේ ආදායමෙන් 75% ක මුදලක් දැනට උපයා දෙන ජයබහලු පර්යන්තයද ඇතුළත් කොළඹ වරායේ නැගෙනහිර ජැටිය ඉන්දියාවට සහ ජපානයට පවරාදීමේ සූදානමක් පවතින බව වාර්තා පළ වෙයි. මහින්ද රාජපක්ෂ අගමැතිවරයාගේ පසුගිය ඉන්දීය සංචාරයෙන් පසුව නැවතත් එකී කටයුත්ත සම්බන්ධයෙන් වැඩිපුර කතාබහට ලක් වෙමින් තිබේ.

කොළඹ වරායේ නැගෙනහිර පර්යන්තය යනු මෙරට ආර්ථිකයේ ප්‍රධානත ම මර්මස්ථානයක් බව අමුතුවෙන් කිව යුතු නොවේ. ආර්ථික වශයෙන් නොව එහි පිහිටි ස්ථානය අනුව කලාපීය ආරක්ෂාව අතින් ද වැදගත් ස්ථානයකි.  එසේ ම විශාල නෞකා ගාල් කිරීම වෙනුවෙන් ගැඹුරෙන් යුත් ප්‍රධානත ම පර්යන්තය ද මෙයයි. කෙසේ වෙතත් මේ ඉන්දියා ජපාන සහයෝගිතාවට කොළඹ වරායේ නැගෙනහිර පර්යන්තය පවරා දීමේ මූලික කටයුතු ආරම්භ කෙරුණේ පසුගිය රජය සමයේදී යි. නැවත කරළිගත වී ඇති උක්ත පැවරුම් කටයුත්තට අනුව පර්යන්තයෙන් 51%ක් ශ්‍රී ලංකා වරාය අධිකාරියට ද අනෙක් 49% ඉන්දු-ජපාන සහයෝගිතාවට ද හිමි වන පරිදි ගිවිසුම් සකස් වන බව කියැවේ. වරයා නිදහස් සේවක සංගමය මේ සම්බන්ධයෙන් දැනටමත් සිය විරෝධය පළ කර ඇති අතර සමස්ත ලංකා වරාය පොදු සේවක සංගමයේ ලේකම් චන්ද්‍රසිරි මහගමගේ මෙම ක්‍රියාවලියට විරුද්ධව ශ්‍රේෂ්ඨාධිකරණයේ මූලික අයිතිවාසිකම් පෙත්සමක්ද ගොනු කර තිබේ.

දැනට ශ්‍රී ලංකා වරාය අධිකාරිය විසින් විශාල වශයෙන් සංවර්ධනය කර ඇති ලාභ ලබමින් තිබෙන කොළඹ වරායේ නැගෙනහිර පර්යන්තය නොරටුන්ට ලබා දීමේ අවශ්‍යතාව කුමක්දැ යි රජය ජනතාවට පැහැදිලි කළ යුතු ය. කලාපීය බල වුවමනාවන්ට යටත් වෙමින් ආර්ථික සහ ආරක්ෂක මර්මස්ථාන නොරටුන්ට ලබා දීම හැරෙන්නට මෙහි ඇති අනෙකක් නැති බව අපගේ අදහසයි.

 

අත්අඩංගුවට ගෙන අධිකරණය වෙත ඉදිරිපත් කළ රුසියාවේ හිටපු ශ්‍රී ලංකා තානාපති  උදයංග වීරතුංග මහතා  17 වැනිදා තෙක් රක්ෂිත බන්ධනාගාරගත කරන ලෙස කොළඹ කොටුව මහේස්ත්‍රාත් රංග දිසානායක මහතා ඊයේ (14) නියෝග කළේය. ඒ අනුව රිමාන්ඩ් බන්ධනාගාර ගත කළ උදයංග මහතා එදින රාත්‍රියේ ම බන්ධනාගාර රෝහලට ඇතුළත් කර ඇත්තේ පපුවේ වේදනාවක් හටගත් නිසා බව වාර්තා වේ.

උදයංග වීරතුංග මහතා ඊයේ (14) අලුයම අපරාධ පරීක්ෂණ දෙපාර්තමේන්තුව විසින් අත්අඩංගුවට ගත්තේ කටුනායක ගුවන් තොටුපළේ දී ය.  මිග් යනා ගනුදෙනුව සම්බන්ධයෙන් සැකකරුවකු ලෙස සැළකෙන රුසියාවේ හිටපු ශ්‍රී ලංකා තානාපති උදයංග වීරතුංග ඊයේ අලුයම 4.37 ට මස්කට් සිට පැමිණි ශ්‍රීලංකන් ගුවන් සේවයට අයත් යානයකින් දිවයිනට පැමිණි බව ගුවන් තොටුපොළ ආගමන විගමන කාර්යාලය සඳහන් කළේ ය. 

වම් ඉවුරේ වෙබ් නාදය