පසුගිය ඔක්තෝබර් 13 වැනිදා රජය විසින් සීනි සඳහා එතෙක් අය කළ රුපියල් 50ක විශේෂ වෙළඳ බද්ද ශත 25ක් දක්වා අඩු කිරීමත් සමඟ ආණ්ඩුවට හිතවත් ව්යාපාරිකයෙක් හදිසියේ ලංකාවට නැව් පිටින් සීනී ආනයනය කරමින් ඇතැයි වාර්තා වේ. බදු සංශෝධනය සිදු කරන විටත් අදාළ ව්යාපාරිකයා සතුව වරායෙන් නිදහස් කර නොගත් සීනී ටොන් 9000ක් තිබී ඇත. එසේ තිබියදී එම ව්යාපාරිකයාම තවත් ටොන් 37,000ක සීනි පිරි නැවක් ලංකාවට ගෙන්වා ඇත. මෙලෙස සීනි පමණක් රැගෙන ලංකාවට නෞකාවක් පැමිණ ඇත්තේ වසර 25කට පමණ පසුව වීම ද විශේෂය. මෙම ව්යාපාරිකයාගේ සීනි ආනයනය නිසා කෝටි 230කට අධික බදු මුදලක් රජයට අහිමි වී ඇත.
ආණ්ඩුව සීනි සඳහා වූ ආනයන බද්ද අඩු කිරීම නිසා සීනි කිලෝවක් රුපියල් 85කට සිල්ලර වෙළඳ පොළෙන් ලබාගත හැකි වනු ඇතැයි පවසා තිබුණත් එම මිලට සීනි මිලදී ගැනීමට නොමැති බව පාරිභෝගිකයෝ ප්රකාශ කරති. සාම්ප්රදායිකව සීනි ආනයනය කරන ව්යාපාරිකයෝද අපහසුතාවයට පත්ව ඇත. සිදුව ඇත්තේ ආණ්ඩුවට කෝටි ගණනක ආදායමක් අහිමි කරමින් සීනි ආනයනය කරන එක් ආනයනකරුවෙකුට රුපියල් කෝටි ගණනක අයුතු ලාභයක් හිමිවීම පමණකි.
ජනතාව දූෂණයට විරුද්ධ විය යුතු බවට ප්රකාශයක් ද ජනාධිපතිවරයා විසින් පසුගියදා ප්රකාශ කර තිබුණි.