Sunday, 28 February 2021

වෛද්‍ය කුමාර වික්‍රමසිංහ - නියෝජ්‍ය සෞඛ්‍ය සේවා අධ්‍යක්ෂ ජනරාල්, ජාතික රෝහලේ අධ්‍යක්ෂ


ජාතික රෝහල කොවිඩ් වසංගතයට මුහුණ දෙන්නෙ කොහොමද?

ජාතික රෝහල කියල කියන්නේ ලංකාවේ තියෙන ප්‍රධානතම සහ විශාලතම රෝහල. ඇඳන් 3270ක් තියෙන අක්කර 32ක් පුරා පැතිරුණ රෝහලක්. නව දහසක විතර කාර්ය මණ්ඩලයක් මෙහි සේවය කරනවා. ලංකාවේ තියෙන සියලූම විශේෂඥ සේවාවන් සපයන තැනක්. ඒ නිසාම කොවිඩ් වසංගතය ඇතුළත වුණත් සාමාන්‍ය සේවාවන් නිතිපතා පවත්වාගෙන යෑමේ අභියෝගයක් අපිට තිබුණා. කොවිඩ් වසංගතයේ පළමු රැල්ල ලංකාවේ ඇති වුණේ පහුගිය අවුරුද්දේ පෙබරවාරි - මාර්තු මාසවල. ඒ අනුව කොවිඩ් රෝගීන්ගෙන් අනෙක් රෝගීන් සහ කාර්ය මණ්ඩලය ආරක්ෂා කරගැනීමේ ක්‍රමවේද සකස් කරන්න සිද්ධ වුණා.

මුලින්ම අපි කොවිඩ් රෝගීන් යැයි සැකකෙරෙන අය වෙනුවෙන්ම සුවිශේෂී වාට්ටු කිහිපයක් වෙන් කළා. ඔවුන් වෙනුවෙන් සිදුකරන පීසීආර් පරීක්ෂණයකින් පසුව තමයි අපි වෙනත් සාමාන්‍ය වාට්ටු වෙත එම රෝගීන් ඇතුළත් කරගත්තේ. සමහර රෝගීන් එනවා ඉතා හදිසියේ කටයුතු කළ යුතුවෙන. ඔවුන්ට කොවිඞ් වැළඳී තියෙන්නත් පුළුවන්. උදාහරණ විදිහට හදවතේ රෝගී තත්ත්ව සමඟ පැමිණෙන්නන්, හදිසි ශල්‍යකර්ම හෝ හදිසි අනතුරුවලට ලක්වී පැමිණෙන්නන්. ඒ අය සඳහා එම සාමාන්‍ය වාට්ටුවලම වෙන්කළ කොටස්වලට ඇතුළත් කර ගත්තා. ඒ අය වෙනුවෙන් රෝහල පැත්තෙන් සිදුකළ යුතු සියලූ කාරණා අපි සිද්ධ කළා.

පසුගිය වසරේ මුල කොවිඩ් වසංගතය ආරම්භ වුණත් ජාතික රෝහලේ පීසීආර් පරීක්ෂණ කරන්න පටන්ගත්තේ මේ වසරේ ජනවාරි මාසයේ බවට මාධ්‍ය වාර්තා පළ වී තිබුණා. මේ නිසා රෝහලේ කොවිඩ් රෝගීන් හඳුනාගැනීමේ ප්‍රමාදයන් ඇති වුණේ නැද්ද?

පීසීආර් පරීක්ෂණය කියන්නේ කොවිඩ්වලට වගේම තවත් රෝග කිහිපයක් හඳුනාගන්න කරන පරීක්ෂණයක්. මීට කලින් අපි කළේ අපිට පීසීආර් පරීක්ෂණයක් කර ගන්න අවශ්‍ය වුණාම වෛද්‍ය පරීක්ෂණ ආයතනය හරහා කරවා ගැනීමයි. ඒක තමයි සාමාන්‍ය ක්‍රමය. නමුත් රටේ කොවිඩ් රෝගීන් වැඩි වෙද්දි පරීක්ෂණ ප්‍රතිපල එන්න ප්‍රමාද වෙන තත්ත්වයක් ඇති වුණා. ඒ වෙලාවේ අපිට වෙනම පීසීආර් පරීක්ෂණාගාරයක් අවශ්‍ය බව අපි තේරුම් අරන් පරීක්ෂණාගාරයක් සෑදිමේ කටයුතු ආරම්භ කළා. ඒ වෙනුවෙන් ජාතික රෝහලේ අලූත් තැනක් හදන්න වුණා, අවශ්‍ය සියලූ උපකරණ ලබාගත යුතු වුණා. ඒක හදිසියේ කළ හැකි දෙයක් වුණේ නැහැ. එතෙක් අපි වෛද්‍ය පරීක්ෂණ ආයතනයට අමතරව කොළඹ වෛද්‍ය පීඨයෙනුත් අවශ්‍ය පීසීආර් පරීක්ෂණ සිදු කරගත්තා. පීසීආර් ප්‍රතිපල ලැබෙන තුරු කියලා අපි කිසිම වෙලාවක රෝගීයාට අවශ්‍ය ප්‍රතිකාර කිරීම් නැවැත්තුවේ නැහැ.

අපේ අලුත් පීසීආර් පරීක්ෂණාගාරයට අවශ්‍ය සියලූම උපකරණ අපිට දානපතියන්ගෙන් ලැබුණා. දැන් අපිට දිනකට පීසීආර් පරීක්ෂණ දෙසීයකට ආසන්න ගණනක් සිදු කරන්න පුළුවන්. ඒ ප්‍රමාණය අපේ රෝහලේ අවශ්‍යතාවයට බොහෝ විට ප්‍රමාණවත්. ඒ වගේම පසුව හඳුන්වාදුන් රැපිඞ් ඇන්ටිජන් පරීක්ෂණයත් දැන් රෝහලට ඇතුළත් කරන හදිසි ප්‍රතිකාර අවශ්‍ය රෝගීන් හැර අන් සියලූම රෝගීන්ට සිදු කරනවා. සියලූම කාර්ය මණ්ඩලය
රෝගීන් වෙනුවෙන් අවශ්‍ය සියලූ කටයුතු ප්‍රමාදයකින් තොරව සිදු කරනවා. කොවිඞ් යැයි සැක කරන රෝගීන්ට පවා අවශ්‍ය සියලු ප්‍රතිකාර ආරක්ෂිත ක්‍රියාමාර්ග අනුව යමින් ඔවුන් සිදු කළා. ඒ නිසා කාර්ය මණ්ඩලයට කොවිඞ් වැළඳීමක් සිදු වුණෙත් නැහැ.

කාර්ය මණ්ඩලයට එන්නත් ලබා දීමේ වැඩ කටයුතු සිද්ධ වුණේ කොහොමද?

එන්නත ලැබිලා දැන් සුළු කාලයක්. මුලින්ම මේ එන්නත ලබා දුන්නේ සෞඛ්‍ය සේවකයන්ටනේ. ඒ අනුව අපි පළමු දිනයේ සිටම අපේ කාර්ය මණ්ඩලයට එන්නත් ලබාදීම ආරම්භ කළා. ඒ අනුව ජාතික රෝහලේ ස්ථාන හතරකදී එම එන්නත් ලබා දීම සිදු කළා. එන්නත් ලබා දීමෙන් පසු යම් සංකූලතා ඇති වෙන්න පුළුවන්. ඒ වගේම කලින් සංකූලතා ඇති වුණු අයත් ඉන්න පුළුවන්. ඒ නිසා එන්නත් ලබා දීමේදී සැලිකිලිමත්ව කටයුතු කළ යුතු වුණා. ඒ අනුව රෝහලේ කාර්ය මණ්ඩලයෙන් 95%කට වැඩි පිරිසක් මේ වන විට එන්නත් ලබාගෙන තියෙනවා. අපේ රෝහලට අමතරව වසංගත රෝග අංශයට, සෞඛ්‍ය අමාත්‍යංශයේ අංශ කිහිපයකටත් ජාතික රෝහලේදී එන්නත් ලබා දුන්නා. ඒ අනුව මේ වෙන විට මේ රෝහලෙන් එන්නත් මාත‍්‍රා 10,100කට ආසන්න ප‍්‍රමාණයක් ලබා දීලා තියෙනවා.

එන්නත් ලබාදුන් අයට අතුරු ආබාධ ඇතිවීමේ ප්‍රවණතාවයක් තිබුණද?

එන්නත ලබා දීමෙන් පසු උණ ඇති වීම වගේ දේවල් සිද්ධ වුණා. ඒක සාමාන්‍ය දෙයක්. කිහිප දෙනෙකුට වමනය ඇතිවෙලා තිබුණා. ඊට අමතරව වෙනත් කිසිදු අතුරු ආබාධයත් ඇති වුණේ නැහැ.

කොරෝනා නිසා රෝහලේ බාහිර රෝගී අංශ, සායන වගේ අනිත් කාර්යයන්ට සිදුවෙලා තියෙන බලපෑම කොහොමද?

කොවිඞ් තත්ත්වය මත රෝහලට රෝගීන් පැමිණීම අඩු වුණා. සාමාන්‍ය දිනකදී සායනවලට සහ බාහිර රෝගී අංශවලට 6,000ක පමණ පිරිසක් රෝහලට පැමිණෙනවා. මිනිසුන් ඒකරාශී වීමෙන් මේ වසංගතය පැතිරීම වේගවත් වෙන්න පුළුවන්. සාමාන්‍යයෙන් සමහර රෝගීන් සායනවලට පැමිණෙන්නේ අවශ්‍ය ඖෂධ අරන් යන්න පමණක්මයි. ඒ අනුව ජනතාව ඒකරාශී වීම වැළැක්වීමේ ප්‍රතිපත්තිය මත සායනවලට පැමිණෙන පිරිස් සීමා කිරීමේ ප්‍රතිපත්තියකට යන්න වුණා. ඒ අනුව දුරකතන සමාගම්වල උදව්වෙන් විශේෂ දුරකතන මාර්ග ගණනාවක් ඒ ඒ සායනවලට ලබා දුන්නා. ඉන් පස්සේ මාධ්‍ය හරහා ඒ ඒ සායනවලට පැමිණෙන අයට ඒ අදාළ දුරකතනය හරහා අවශ්‍ය ඖෂධ ලබා ගැනීමට අවශ්‍ය කටයුතු සූදානම් කළා. ඒ වෙනුවෙන් කාර්ය මණ්ඩලය යෙදෙව්වා. එම රෝගීන්ට අවශ්‍ය ඖෂධ තැපැල් මාර්ගිකව ලබා දුන්නා. ඒ අනුව තවමත් අපි දහසක පමණ පිරිසකට තැපැල් මාර්ගිකව බෙහෙත් යවනවා. මේ වන විට නැවතත් ටිකෙන් ටික සායනවලට පිරිස් පැමිණෙනවා.

කෙනෙකුට හිතෙන්න පුළුවන්, අසනීපයක් වුණොත් මොකද කරන්නේ කියලා. ජාතික රෝහලේ කිසිම අංශයක් වහල නැහැ. එන ඕනෙම රෝගියෙක් භාර ගන්නවා. බාහිර රෝගී අංශයෙත් අවශ්‍ය කටයුතු සූදානම් කරල තියෙනවා. ඒ වගේම කොවිඞ් යැයි සැක කෙරෙන, නැත්නම් කොවිඞ් පැතිරෙන ප්‍රදේශවලින් පැමිණෙන රෝගීන් වෙනුවෙන් වාට්ටු සහ ශල්‍යාගාර පවා අපි වෙන් කරල තියෙනවා.

කොවිඩ්වලට අමතරව වෙනත් බෝ නොවන රෝග නිසා සිදුවන මරණවල වැඩි වීමක්, එහෙමත් නැත්නම් නිවසේදී සිදුවන මරණවල වැඩිවීමක් වාර්තා වෙලා තියෙනවද?

සංඛ්‍යා ලේඛනවලට අනුව නම් එහෙම දෙයක් පේන්නේ නැහැ. රෝගියා රෝහලකට ගෙනයාම සඳහා වූ තීරණ ගැනීමේ ප්‍රමාදකම් කවදත් තිබුණා. බෝ නොවන රෝගී සමහර අය ඉන්නවා කොවිඞ් තිබුණත් නැතත් හරියට බෙහෙත් ගන්නේ නැති අය. සමහර අය තවමත් ඉන්නවා එවන් රෝගයක් තමන්ට තියෙන බව නොදන්න, තමන් වෙනුවෙන් වෛද්‍ය පරීක්ෂණයක් කර නොගන්න අය ඉන්නවා. මේ කාලය තුළ බෝ නොවන රෝගී සංකූලතා සහ මරණ වාර්තා වූ බවක් සංඛ්‍යා ලේඛනවලට අනුව පේන්නේ නැහැ.

තව කලක් මේ විදිහට කොවිඩ් සමඟ අපට ඉන්න වේවි නේද?

ඔව්, කොවිඩ් වසංගතය සමඟ අපට ජීවත් වෙන්න සිදු වේවි. ලොක්ඩවුන් තත්ත්ව ඇති කිරීමත් අපේ වගේ රටකට දරාගන්න පුළුවන් දේවල් නෙවෙයි. එන්නත ඉක්මණින් සියලු දෙනාටම ලබා දිය යුතුයි. අපි දන්නවා වෛද්‍ය විද්‍යාත්මකව ජනගහනයෙන් 70% - 80%කට එන්නත ලබා දුන්නාම සාමූහික ප්‍රතිශක්තියක් ඇති වෙලා බෝ වීමේ ප්‍රවණතාවය අඩු වෙනවා. එන්නත ලබා ගත්තාය කියලා කොවිඩ් ආසාදනය වීම නවතින්නේ නැහැ. එන්නත ලබා දීමේ පරමාර්ථය තමයි කොවිඞ් නිසා සිදුවන මරණ සහ සංකූලතා අවම කරගැනීම. ඒ නිසා එන්නත ලබා ගැනීම අනිවාර්යයෙන් කළ යුතුයි.

අවසන් වශයෙන් ජාතික රෝහල කොවිඞ් අභියෝගයට සාර්ථකව මුහණ දෙමින් ඉන්නවා කියල හිතෙනවද?

කොවිඩ් වසංගතය මැද අපේ කාර්ය මණ්ඩලයට අවශ්‍ය කරන රෝගී සත්කාරක කටයුතු ප්‍රමාදයකින් තොරව, නිසි පරිදි පවත්වාගෙන යන්න හැකි වුණා. ඒ අනුව ජාතික රෝහල විදිහට අපේ කාර්ය නොපිරිහෙලා ඉෂ්ඨ කළා කියලා මම හිතනවා. 

# සාකච්ඡාව - සමන් ජයකොඩි 

 

ලංකා සමසමාජ පක්ෂයේ ප්‍රධාන ලේකම් පාර්ලිමේන්තු මන්ත්‍රී මහාචාර්ය තිස්ස විතාරණ


සාකච්ඡාව - සමන් ජයකොඩි #


ලංකා සමසමාජ පක්ෂය මේ සතියේ තමන්ගේ 85වන සංවත්සරය සමරනවා. ඒ වෙනුවෙන් වූ වැඩසටහන්වලින් අපි සාකච්ඡාව ආරම්භ කරමු.

ඔව්. අපි මුලින් සැලසුම් කළ වැඩසටහන් ඒ විදිහටම කරන්න බැරි වෙනවා. නමුත් අපි 18 වැනි සිකුරාදා සරල උත්සවයක් සංවිධානය කරල තියෙනවා. සෞඛ්‍ය උපමාන අනුවයි ඒ අවස්ථාව සංවිධානය කරන්නේ.

ජාත්‍යන්තරව සලකන විට ආසියානු ආර්ථිකයේ නැගීමක් පිළිබඳ කතා වෙනවා. වාමාංශික පක්ෂයක් හැටියට ඒ පිළිබඳ දරන්නේ මොනවගේ අදහසක්ද?

ආසියානු ආර්ථිකයේ වර්ධනය සලකපුවාම චීන ආර්ථිකය ඉන් සුවිශේෂී. අපට ඉමහත් සතුටක් තියෙනවා චීනයේ ආර්ථික වර්ධනය පිළිබඳව. පසුගිය සතියේ ජාත්‍යන්තර මූල්‍ය අරමුදල පවා ප්‍රකාශයක් කරමින් ඇමරිකාව පරාජය කරමින් චීනය ලෝකයේ පළමුවැනි ආර්ථිකය බවට පත්ව ඇති බව පිළිඅරන් තියෙනවා. ඒක විශිෂ්ඨ ජයග්‍රහණයක්. අධිරාජ්‍යවාදයේ එක්තරා ආකාරයක පරාජයක් විදිහටත් අපට මේක සලකන්න පුළුවන්. ඉදිරියේදී ඇමරිකානු ඩොලරය වෙනුවට චීන යුවානය ජාත්‍යන්තර වෙළඳ පළට ආදේශ වේවි. චීනයට උවමනා කරන්නේ වෙළදාම පමණයි. චීනය අධිරාජ්‍යවාදී රටක් නෙවෙයි. ඒ වගේම චීනය තවත් රටවල් පහළොවක් එකතු කරගෙන පසුගිය කාලයේ ඇතිකරගත් වෙළඳ ගිවිසුම ආසියානු ආර්ථිකයට තවත් ශක්තියක් වෙයි කියල මම හිතනවා.

ඇමරිකාව ඇතුළු අධිරාජ්‍ය රටවලට උවමනා වුණේ නව ලිබරල්වාදය ඔස්සේ තුන්වන ලෝකයේ රටවල් ඍජු සූරා කෑමකට ලක් කරන්න. එම්සීසී ගිවිසුම ආදී ගිවිසුම් අප මත පටවන්නේ ඒ මූලෝපාය හරහායි. චීනය ප්‍රමුඛ ආසියානු ආර්ථිකයේ පිබිදීම නිසා අධිරාජ්‍යවාදයේ මෙවන් සූරා කෑම් ඉදිරියේදී යම් දුර්වල වීමකට ලක්වෙයි කියල මම හිතනවා.

නමුත් ලොව පුරාත්, ලංකාවේත් චීන විරෝධී ප්‍රචාරයන්ගේ අඩුවක් නැහැ.

අනිවාර්යයෙන්ම. ඒක තමයි අධිරාජ්‍යවාදීන්ගේ උවමනාව. එවන් බලපෑම් අප වැනි රටවල්වලටත් තියෙනවා. ඔබාමා ජනාධිපති කාල සීමාව අවසන් කරන්න වසර දෙකකට පමණ පෙර බටහිර ලෝකයේ ප්‍රධාන ආර්ථික විද්‍යාඥයන්ගේ සමුළුවකදී අනාවැකි පළ කර තිබුණා, අද තියෙන තත්ත්වය ගැන. ඒ කියන්නේ 2020 - 30 දශකය වන විට චීනයේ නැගීම පිළිබඳ අනාවැකි පළ කළා. ඒ නිසා ඊට විරුද්ධ ගත හැකි සියලූ ක්‍රියාමාර්ග ගැනීමට අධිරාජ්‍යවාදීන් පසුබට වුණේ නැහැ. චීනයට විරුද්ධ ප්‍රචාරය එන්නෙත් එහෙමයි. පහුගිය කාලය පුරා ඇමරිකානු ජනාධිපති ට්‍රම්ප් චීනයට විරුද්ධව වෙළඳ යුද්ධයක් කළෙත් ඒ නිසයි. චීනයෙන් ආනයනය කරන සියලූ දේට විශාල බදු පැනෙව්වා. එහෙම තමයි අධිරාජ්‍යවාදය ක්‍රියා කළේ. ඇත්තටම චීනයට ඔවුන් බය වුණා කිව්වොත් නිවැරදී.

ජාත්‍යන්තරවත්, දේශීයවත් විශාල ආර්ථික අවපාතයකට මුහුණ දෙමින් ඉන්නවා?

මේ ආර්ථික අර්බුදය අපි පුදුම වෙන්න දෙයක් නෙවෙයි. ලෝකයම ආර්ථික අර්බුදයක ඉන්නවා. 1929 - 33 කාලයේ තිබුණා වගේ ආර්ථික අවපාතයක තත්ත්වයට ඒ අර්බුදය වර්ධනය වේ යැයි ආර්ථික විශ්ලේෂකයන් මත පළ කරනවා. රටවල් ගණනාවක් වර්තමානයේදී ඍණ ආර්ථික වර්ධනයන් දක්වා පල්ලම් බැහැලා තියෙනවා. ලංකාවටත් ඒක සිද්ධ වෙලා තියෙනවා.
අපි පක්ෂයක් විදිහට විශේෂයෙන් අයවැය වෙනුවෙන් අපේ අදහස් ලබා දීමේදී දිගින් දිගටම කියපු කාරණාවක් තමයි, මෙවන් ආර්ථික අවපාතයක් ඉදිරියේදී එන්න නියමිතයි, ඒ නිසා ඊට සූදානම් වීමත් ජනතාව දැනුවත් කිරීමත් කළ යුතු බව. ඒ වෙනුවෙන් අපි පටි තද කළ යුතු බව අපි කිව්වා. මෙතනදි කියන්න අවශ්‍යයි පටි තද කළ යුත්තේ පුංචි මිනිහගෙ, සාමාන්‍ය ජනතාවගෙ නෙවෙයි, මුදල් තියෙන කෝටිපතියගෙනුයි පටන් ගත යුත්තේ. එහෙමයි අපි ආණ්ඩුවලට කිව්වේ. නමුත් ඒක සිද්ධ වෙලා නෑ. වර්තමානයේදී පුද්ගලික බද්ද 14%කටත් ආයතනගතව 18%ක් වැනි ප්‍රතිශතයකටත් බදු අඩු කිරීමක් කරල තියෙනවා. මෙය කිසිසේත් සාධාරණ ක්‍රියාවක් නෙවෙයි. එවැනි ප්‍රතිපත්ති ක්‍රියාත්මක කළොත් තමයි සාමාන්‍ය ජනතාවගේ පිට වැඩි බර නොදා රට බේරා ගන්න හැකි වෙන්නේ. වෙළඳ ශේෂ හිඟය පියන්න, ණය බර අඩු කිරීම ආදි යෝජනා ගණනාවක් අපි ආණ්ඩුවට ඉදිරිපත් කරල තියෙනවා.

ලංකා සමසමාජ පක්ෂය වර්තමානයේ කටයුතු කරන්නේ ශ්‍රී ලංකා පොදුජන සන්ධනානයේ. ඔබලාට සන්ධාන දේශපාලන නුපුරුදු දෙයක් නෙවෙයි. මේ සන්ධානය ගැන තියෙන අදහස මොකක්ද?

වර්තමානයේදී පෙර සන්ධානවල තිබුණු ආකාරයේ පක්ෂ අතර සම්බන්ධයේ, සාකච්ඡාවේ අඩුවක් අපිට පේන්න තියෙනවා. කලින් සතිපතා අගමැතිවරයාගේ ප්‍රධානත්වයනේ පක්ෂ නායක හමුවීම් තිබුණා. දැන් එහෙම දෙයක් සිද්ධ වෙන්නේ නැහැ. මේ තත්ත්වය මත අපේ අදහස් නායක මට්ටමින් ඉදිරිපත් කරන්න අවස්ථාව අපට අහිමි වෙලා තියෙනවා. ඒ නිසා ආණ්ඩුව ගන්න තීන්දු අනුව අපට සිද්ධ වෙනවා, ඒ තීන්දු පස්සෙ දැනගෙන අකමැති වුණත් ඒවට එකඟ වෙන්න. එය කිසිසේත් සන්ධානයක් හැටියට කටයුතු කිරීමේදී සුදුසු දෙයක් නෙවෙයි. මේ තත්ත්වය ඉතා ඉක්මනින් වෙනස් විය යුතුයි. අපි ප්‍රාර්ථනා කරනවා ඉදිරි කාලයේදී මේ තත්ත්වය වෙනස් වෙයි කියලා.

වමේ සහ ප්‍රගතිශීලී බලවේගවල එකතුවක් පිළිබඳ හැමදාම කතා වෙනවා?

ඒ ගැන අපි වඩා හොඳින් කල්පනා කළ යුතු කාලයක් කියලයි අපි හිතන්නේ. අද වෙද්දි වෙනදාටත් වඩා අපි කොමියුනිස්ට් පක්ෂය එක්ක ඉතා කිට්ටුවෙන් වැඩ කරනවා. ඒ ගැන අපි පක්ෂයක් විදිහට ඉතාමත් සතුටුයි. අප පක්ෂ දෙක අතර දේශපාලන වශයෙන් වෙනසක් නැහැ. එක් මාක්ස්වාදී පක්ෂයක් විදිහට පක්ෂ දෙක එක් වෙන්න වුණත් අපිට කාලය ඇවිත් කියලයි මම හිතන්නේ. ඒකට අපිට සමාජවාදී ජනතා පෙරමුණේ ක්‍රියා කරන මහජන පක්ෂත් දේශවිමුක්ති ජනතා පක්ෂයත් සම්බන්ධ කරන්න පුළුවන්. ඒ සමගිය තුළින් වඩා කිට්ටුවෙන් වැඩ කළ යුතු කාලයක් කියල මම හිතනවා. එහෙම එකතු වීම තුළින් අපේ ශක්තිය අපේ හඬ වර්ධනය කරන්න පුළුවන්.
ඒත් සමඟම මහජන එක්සත් පෙරමුණ සහ ශ්‍රී ලංකා නිදහස් පක්ෂය වැනි පක්ෂ සම්‍ඟත් එකඟත්වයෙන් වැඩ කරන්න අපි උත්සාහ කළ යුතුයි. ඒ හරහා සන්ධානය තුළ අපේ ශක්තිය වැඩි කරගන්න අපට හැකිවෙයි කියල මම හිතනවා.

නියෝජ්‍ය සෞඛ්‍ය සේවා අධ්‍යක්ෂකවරයා පවසා තිබුණා, මූලාශ්‍රයක් නැති කොවිඞ් 19 රෝගීන් සමාජයෙන් වාර්තා වුණත් තවමත් කොවිඞ් 19 සමාජගත වීමක් නැහැ කියලා. ජ්‍යෙෂ්ඨ වෛරස පිළිබඳ විශේෂඥවරයෙක් වශයෙන් මේ ගැන ඔබේ අදහස කුමක්ද?

දැනටමත් කොවිඞ් 19 රෝගය සමාජගත වෙලා අවසන්. ඒ පිළිබඳව මගේ නම් කිසිම සැකයක් හෝ දෙගිඩියාවක් නැහැ. සමාජයේ ඕනෑම පුද්ගලයෙකුගෙන් තමන්ට මේ රෝගය ආසාදනය වෙන්න පුළුවන් කියල හිතලා තමන් ආරක්ෂා වීමයි දැන් කළ යුත්තේ. ඒ සඳහා හඳුන්වා දී තිබෙන මූලික සෞඛ්‍ය පුරුදු තුන අනුව කටයුතු කළ යුතුයි. ඒ කියන්නේ සමාජ දුරස්ථ භාවය, මුව ආවරණ පැළඳීම සහ දෑත් පිරිසිදු කිරීම. ඒ අනුව කටයුතු කරනවා නම් අපට මේ වෛරසයෙන් බේරෙන්න පුළුවන්. ⋆

 

 

 

 

 ඩිව් ගුණසේකර


ඔබ කොමියුනිස්ට් පක්ෂයේ ප්‍රධාන ලේකම් ධුරයෙන් ඉවත් වුණේ ඇයි කියන තැනින් අපි සාකච්ඡාව පටන් ගනිමු.

අප මේ පසුකරමින් ඉන්නේ අපේ රටේ සංවර්ධනයේ නව අදියරකට පිවිසෙමින් සිටින කාලයක්. ඒ වගේම පශ්චාත් කොවිඩ් කාල පරිච්ඡේදය තුළ විවිධ වෙනස්වීම් සිදුවෙන කාලයක්. චීන ජනාධිපති ෂී ජින්පින් මෙකී වෙනස්වීම් දකින්නේ කැලඹිලි සහිත වෙනස්වීම් වශයෙන්.

ඒ වගේම අපේ රට තුළ නව ජනාධිපතිවරයෙක්, නව පාර්ලිමේන්තුවක් පත්ව තියෙනවා. නව ලිබරල්වාදයේ නිමාවක් ඇති වෙමින් තිබෙනවා. සියලු දේශපාලන පක්ෂ නව ආර්ථික විකල්පයක් ගැන කතාකරන්න පටන් අරගෙන. වමේ ව්‍යාපාරයට, මෙම වර්ධනයන් ප්‍රවනතාවයන් පිළිබඳ තක්සේරුවක් තිබිය යුතුය. අපි හැමෝටම අලුතෙන් සිතන්න සිදුවී තියෙනවා. ඒ සඳහා වමේ නායකත්වය නව පරම්පරාවට පැවරිය යුතුයි.

මා අයත් වන්නේ ශ්‍රී ලංකාවේ වමේ ව්‍යාපාරයේ තුන්වන පරම්පරාවට. මේ ගතවෙමින් තියෙන වෙලාව, අපේ පක්ෂයේ නායකත්වය හතරවන පරම්පරාවට භාර දිය යුතු අවස්ථාව යැයි මා අදහස් කළා. ඒ බව මම අපේ පක්ෂයේ මධ්‍යම කාරක සභාවට දන්වා සිටියා. ඒ අනුව මා ප්‍රධාන ලේකම් ධුරයෙන් මුදා හරින ලෙස මධ්‍යම කාරක සභාවෙන් ඉල්ලා සිටියා. මධ්‍යම කාරක සභාව ඒකමතිකව එම යෝජනාව පිළිගත්තා.


සිදුවිය හැකි යැයි ඔබ සිතන වෙනස්වීම් මොනවාද? ඒ පිළිබඳ විග්‍රහයක් කළොත්?

අප ගෝලීය මෙන්ම ජාතික වශයෙන් ආර්ථික අර්බුදයක ගිලී සිටිනවා. කොවිඩ් 19 ගෝලීය වසංගතය ඊට බලපෑ එක් සාධකයක් පමණයි. එය ආසන්න හේතුව. දුරස්ථ හේතු තමයි නව ලිබරල්වාදී ආර්ථික උපාය මාර්ගය. අප දැන් ඉතිහාසයේ සන්ධිස්ථානයකට පැමිණ තිබෙනවා. මෙය නව ලිබරල්වාදය අර්බුදයට පත්ව තිබෙන අවස්ථාවක්.  එය සිදුව තිබෙන්නේ වසර 40කට පසුව.

නව ලිබරල්වාදය අපේ රටට හඳුන්වා දුන් එක්සත් ජාතික පක්ෂයට ජනතාව දඬුවම් ලබාදී තිබෙනවා. පක්ෂය දෙකඩ වෙලා. නව ලිබරල්වාදයේ නායකයා පාර්ලිමේන්තුවෙනුත් පිටමං කරලා. ධනේශ්වරයේ ප්‍රධාන පක්ෂය කැඩී බිඳී ගොස්. මෙය කිසිවෙක් අපේක්ෂා නොකළ ද වළක්වාලිය නොහැකි වූ සිද්ධියක්. හේතුව නව ලිබරල්වාදයේ අර්බුදයයි. ගෝඨාභය රාජපක්ෂට දැවැන්ත වරමක් ලැබුණේ එහි ප්‍රතිපලයක් වශයෙන්. සාමාන්‍යයෙන් අපේ මැතිවණ ක්‍රමය යටතේ තුනෙන් දෙකක බලයක් ලබා ගත නොහැකියි. 1978 ආණ්ඩුක්‍රම ව්‍යවස්ථාවේ නිර්මාතෘවරුන් එම ව්‍යවස්ථාව නිර්මාණය කළේ තුනෙන් දෙකක බලයක් ලැබීම වළක්වාලීමේ අරමුණින්. කිසිදු පක්ෂයකට තුනෙන් දෙකක් නොලැබෙන ලෙසයි. මැතිවරණ ක්‍රමය සකස් කළේ නව ලිබරල්වාදයේ පැවැත්ම තර්ජනයකට ලක්වීම වළක්වාලීමේ අපේක්ෂාවෙන් වුණත් නොසිතූ දෙයක් සිදුවුණා. නව ලිබරල්වාදයේ අර්බුදයේ ප්‍රබලත්වය ඉන් තේරුම්ගත හැකියි.

අපේ ක්ෂණික කාර්ය භාරය වන්නේ ආර්ථිකය පණගැන්වීමයි.  දෙවනුව, ආර්ථිකය යථා තත්ත්වයට පත් කිරීමයි. තුන්වෙනුව යළි වේගවත් වර්ධනයකට ආර්ථිකය පත් කිරීමයි. 2015 දී අපේ ආර්ථිකයේ වර්ධන වේගය 5%ක් පමණ වුණා. වසංගතයෙන් පසු 2%ට අඩු වුණා.  දැන් එය ඍණ දෙක දක්වා අඩු වෙලා. මීළඟ වසර දෙක තුළ අප 5%ක වර්ධනයක් ලබාගත යුතුය.

අපේ විදේශ ණය ප්‍රමාණය ඩොලර් බිලියන 55ක්. දේශීය ණය ප්‍රමාණය රුපියල් ට්‍රිලියන 15ක් පමණ වෙනවා. අපට ඩොලරුත් නැහැ. රුපියලුත් නැහැ. විදේශ ආයෝජන ලැබෙන්නෙත් නැහැ. ආධාර දෙන්න කෙනෙකුත් නැහැ. අද අපේ සහයට සිටින්නේ චීනය පමණයි.

මේ ගෝලීය ආර්ථික අර්බුදය චීනයට බලපාන්නේ නැද්ද?

ඇයි නැත්තේ. චීන ආර්ථිකයත් ලෝක ආර්ථිකය තුළයි ක්‍රියාත්මක වෙන්නේ. ගෝලීයකරණයේ ප්‍රතිපලයක් වශයෙන් ගෝලීය අර්බුදය චීනයටත් බලපා තිබෙනවා.

ඒත් චීන කොමියුනිස්ට් පක්ෂය ක්‍රියා කරන්නේ දැක්මක් අනුව බුද්ධිමත් ලෙසයි.

විදේශ වෙළදාම අඩුවන විට චීනය කළේ නිෂ්පාදනය දේශීය වෙළෙඳපොළට හැරවීමයි. අතිරික්ත නිෂ්පාදනය චීන ජනතාවගේ පරිභෝජනයට හැරෙව්වා. එවැනි අභ්‍යන්තර ගැලපීම් සිදු කිරීමට චීනය සූදානමින් සිටියේ. ඒ ඔස්සේ අර්බුදයේ බලපෑම අවම කළා. දැන් චීන ආර්ථිකය යළි පණ ගන්වා තිබෙනවා. එය තමයි චීන ආර්ථික ක්‍රමයේ සහ සංවර්ධිත ධනේශ්වර ආර්ථිකයත් අතර ඇති වෙනස.

චීන කොමියුනිස්ට් පක්ෂය ගැන කතා කරන විට ඔවුන් හා ඔබ පක්ෂයේ සම්බන්ධය කුමක්ද?

ශ්‍රී ලංකාවේ කොමියුනිස්ට් පක්ෂය තමයි චීන විප්ලවයෙන් පසු නව කොමියුනිස්ට් චීනය පිළිගැනීමට සටන් කළ එකම පක්ෂය. ඒ වගේම අපි තමයි චීන කොමියුනිස්ට් පක්ෂය සමඟ සබඳතා ගොඩනැගූ පළමු පක්ෂය.  අපේ පක්ෂයේ නිර්මාතෘ දොස්තර සුගීශ්වර වික්‍රමසිංහ තමයි චීන නායකයන් හමුවූ පළමු ශ්‍රී ලාංකිකයා.  චීන විප්ලවයටත් පෙර දොස්තර වික්‍රමසිංහට චීන නායකයින් මුලින්ම හමුවුණේ  1945 දී ප්‍රංශයේ පැරිස් නුවර පැවැති ලෝක කම්කරු සම්මේලනයේ ආරම්භක සැසිවාරයට සහභාගි වී සිටින අවස්ථාවක. චූ එන් ලායි හා ඩෙන් ෂියාපින් එවකට අධ්‍යාපනය ලැබුවේ ප්‍රංශයේ පැරිස් නුවරයි.

ඉන්පසු රබර් - සහල් ගිවිසුම වෙලාවේ ඒ සඳහා පළමු නිල දූත මණ්ඩලය චීනයට යෑමට පහසුකම් සැලසුවේ පීටර් කෙනමන් සහෝදරයායි. ලෝකයේ සහල් හිඟයක් ඇතිවූ අවස්ථාවේ චීනයෙන් සහල් ලබා ගැනීමට යෝජනා කළේ දොස්තර වික්‍රමසිංහ සහ පීටර් කෙනමන්. ඉන්පසු පළමුව සර්වපාක්ෂික නියෝජිත මණ්ඩලයක් චීනයට යැවීමට කටයුතු කළේත් පීටර් කෙනමන්. ඒ වන විට චීනය සමඟ තානාපති සබඳතා තිබුණේ නැහැ.

ඔබ චීනයට ගොස් තියෙනවද?

ඔව්. හතර පස් වතාවක් ගොස් තිබෙනවා. මා මුලින්ම චීනයට ගියේ 1978 ප්‍රතිසංස්කරණ ආරම්භ කළ විගසයි. පළමු නිදහස් වෙළෙඳ කලාපය තනන අවස්ථාවේ අප එය බැලීමටත් ගියා.

1987 දී අප පක්ෂයේ ත්‍රි පුද්ගල නියෝජිත මණ්ඩලයක් චීනයට ගියා. පීටර් කෙනමන්, පී. කුමාරස්වාමි සහ මම එහි සාමාජිකයන්. එහිදී චීන කොමියුනිස්ට් පක්ෂයේ ප්‍රධාන ලේකම් හමුවීමට අපට ආරාධනයක් ලැබුණා. එම හමුවීම සිදුවුණේ ඔහුගේ පෞද්ගලික නිවසේ. ඔබ පුදුම වෙයි, අපි රාත්‍රී අටේ ඉදලා පසුදා පාන්දර දෙක පමණ වනතෙක් දේශපාලනය ගැන සාකච්ඡාවක යෙදී සිටියා. එම වකවානුව සෝවියට් සංගමයේ අර්බුද පැන නැගෙමින් තිබුණු වකවානුව.

ඉන් සතියකට පෙර සෝවියට් නායක මිහායිල් ගොර්බචොප් චීනයට පැමිණ තිබුණා. ඒ අවස්ථාවේදී චීන කොමියුනිස්ට් පක්ෂයේ ප්‍රධාන ලේකම් Hu Yaobang  රුසියාවේ ගොර්බචොප්ට මෙසේ අවවාද කළ බව අපට කීවා.

“ආර්ථික ප්‍රතිසංස්කරණ කළාට කමක් නැහැ. ඒත් දේශපාලන ප්‍රතිසංස්කරණ කරන්න ගිහින් රාජ්‍ය යන්ත්‍රණයේ උපරි ව්‍යුහය බිඳ දමා ගත හොත් දේශපාලන බලය නැතිවී යන බව තේරුම් ගන්න”

එසේ කීවේ 1987 දෙසැම්බර්වල. සමාජවාදී කඳවුරේ බිඳ වැටීම ආරම්භ වුණේ 1989 දී. 1991 වන විට සෝවියට් සංගමය ද බිඳ වැටුණා.

චීනයේ ප්‍රතිසංස්කරණ වැඩ පිළිවෙල නිවැරදී කියා ඔබ සිතනවාද?

චීනය තම නව ආර්ථික උපාය මාර්ගයට පිවිසුණේ සාධක තුනක් සැලකිල්ලට ගෙනයි.

  1. සමාජවාදයේ අත්දැකීම
  2. සංවර්ධනය වන රටවල අත්දැකීම්
  3. සංවර්ධිත ධනපති රටවල අත්දැකීම්

චීනයේ පවතික වාස්තවික කොන්දේසි සහ ඓතිහාසික සාධකත් සැලකිල්ලට ගෙන නව ආර්ථික උපාය මාර්ගය තීරණය කළා. එහි සාර්ථකත්වය අනුව නිවැරදි බව ඔප්පු වී තිබෙනවා.

ලෙනින් සහෝදරයා මිය යෑමට පෙර 1924 දී ලියූ අවසන් න්‍යායික සංග්‍රහයේ දක්වා තිබෙන එක් කරුණක් තමයි සෝවියට් දේශයේ සමාජවාදයේ පැවැත්ම සහතික වීමට නම්, චීන විප්ලවය සිදුවිය යුතුය යන්න. එය අර්ථකථනය කරන්නේ කෙසේද? චීන විප්ලවය සිදුවුව හොත් විශාලතම වෙළෙඳ පොළ නිර්මාණය වෙනවා. සෝවියට් සංගමයේ ආර්ථිකය සංවෘත ආර්ථිකයක්. විදේශ වෙළඳාම සීමාවී තිබුණා. එය තරගකාරීත්වයට බාධාවක්. එහි ප්‍රතිපලය වුණේ භාණ්ඩ නිෂ්පාදනයේ ගුණාත්මක භාවය නැති වීමයි. ආර්ථික අර්බුදයට හේතු වුණේ එයයි. චීන විප්ලවය සිදුවූයේ 1949 දී. වසර විසිපහකට පසු. අද චීනයේ ශක්තිය තම විශාලතම වෙළෙඳ පොලයි.

තව කාරණයක් කියන්න ඕනේ. ලෝක යුද්ධ ඇතිවුණේ වෙළෙඳ පොළවල් අල්ලා ගැනීම සඳහායි. න්‍යෂ්ඨික අවි බල තුලනය නිසා ලෝක යුද්ධ හටගෙන නැහැ. වර්තමානයේ යුද්ධය දේශපාලන විසඳුමක් හැටියට යොදා ගන්න අද අමාරුයි. යුද උණුසුම් තත්ත්වයක් ඇති කිරීම තමයි කළ හැක්කේ. සාමකාමී සහජීවන ප්‍රතිපත්තිය බිහිවුණේ එම අවශ්‍යතාවය නිසයි. චූ එන් ලායි මෙම ප්‍රතිපත්තියේ නිර්මාපකයෙක්. චීනයේ නව ප්‍රතිපත්තිය ආර්ථිකය විවෘත කිරීම සිදු කළේත් එකී ප්‍රතිපත්තිය අනුවයි.

ඇමරිකා - චීන වෙළෙඳ යුද්ධය පිළිබඳ ඔබේ විග්‍රහය කුමක්ද? චීනය සමඟ ඇති වෙළෙඳ සබඳතා මුළුමනින්ම අත්හරීද?

අද ලෝක ආර්ථිකය අන්තර් සබඳතාවයෙන් යුක්තයි. ඒකාග්‍රතාවයන් ඇතිවී තිබෙනවා. අන්‍යෝන්‍ය වශයෙන් යැපෙනවා. එම යථාර්ථය තුළ වෙළඳ සබඳතා මුළුමනින්ම බිඳී යෑමක් සිදුවිය නොහැකියි. මේවා දේශපාලන උප්පරවැට්ටි. නොවැම්බරයේ ඇමෙරිකාවේ ජනාධිපතිවරණයෙන් පසු යථාර්ථය මතුවේවි.

සරල කාරණය අධිරාජ්‍යවාදය දේශපාලන, ආර්ථික හා තාක්ෂණික වශයෙන් දුර්වලවී තිබෙනවා. චීනය, තාක්ෂණය අතින් G5 තාක්ෂණයත් සමඟ ඇමෙරිකාවට සමීප වී තිබෙනවා. ‘බ්‍රෙක්සිට්’ නැත්නම් බ්‍රිතාන්‍යය යුරෝපා සංගමයෙන් වෙන්වීමෙන් දුර්වලවී තිබෙනවා. චීන - රුසියා උපාය මාර්ගික හවුල්කාරීත්වය තුළින් මිලිටරිමය වශයෙන්ද ඇමෙරිකාවට අභියෝගයන් එල්ල වී තිබෙනවා.

මෙම තත්ත්වය තුළ අධිරාජ්‍යවාදය හමුවේ ඇත්තේ විකල්ප තුනක් පමණයි. ඒ, චීනය සමඟ සහයෝගයෙන් කටයුතු කිරීම, ගැටුම්කාරී තත්ත්වයකට යාම හෝ තරග කිරීම. නමුත් තරග කිරීමට ශක්තියක් නැහැ. ගැටුම්කාරීත්වයකට සූදානමක් නැහැ. සහයෝගයෙන් කටයුතු කිරීමට දීර්ඝකාලීන බියක් දක්වනවා. මෙම උභතෝකෝටිකය තුළ ඇමරිකාව කලාපීය යුද්ධ උණුසුම් තත්ත්වයක් නිර්මාණය කිරීමේ උත්සාහයට ඇවිත් තියෙනවා. 

මෙය ඉතිහාසයේ මෙතෙක් අත්නොදුටු තත්ත්වයක්. සංවර්ධිත ධනේශ්වර රටකට ලෝක යුද්ධයක් කරා යන්නට අවකාශ නැහැ. යුද බිය තුලනකයක් තියෙනවා. අනිත් අතට යුද්ධය තවදුරටත් අර්බුදවලින් ගොඩ ඒම සඳහා වූ දේශපාලන විසඳුමක් නෙවෙයි. දැන් පවතින්නේ බහු ධ්‍රැව ලෝකයක්. ඇමරිකාව එදා රජ කළේ ඒක ධ්‍රැව ලෝකයක.

ඇමෙරිකාවේ නොවැම්බර් ජනාධිපතිවරණයේ ජයග්‍රහණය කාට හිමි වේද?

කවුරු බලයට පැමිණියත් යථාර්ථයට මුහුණ දීමට සිදුවෙනවා. ඩිමොක්‍රටික් පක්ෂයේ බයිඩන් ජයගත්තත් ප්‍රතිපත්තිවල ලොකු වෙනසක් සිදුවන්නේ නැහැ. දෙගොල්ලොම අධිරාජ්‍යවාදයේ දෙබෑයෝ.

සමහර අවස්ථාවල ඩොනල්ඩ් ට්‍රම්ප් සාධනීයයි. මා දන්නා ආකාරයට ඇමරිකානු ජනාධිපතිවරු අතුරින් යුද්ධයක් ප්‍රකාශ නොකළ එකම ජනාධිපති ඔහුයි. ඔහු කෑගසන පුද්ගලයෙක් බව සැබෑව. ඒ වගේම කෑනොගසන පුද්ගලයන් වඩා බියකරු පුද්ගලයන් වෙන්නත් පුලුවන්. යුද්ධ ප්‍රකාශ කර තිබෙන්නේ එවැනි අය. 

මෙම සන්දර්භය තුළ ශ්‍රී ලංකාවේ විදේශ ප්‍රතිපත්තිය කුමක් විය යුතුද?

පළමුව ශ්‍රී ලංකාව සැලකිල්ලට ගත යුතු කාරණාව තමයි, ආසියානු යථාර්ථය. අද ආසියාව ලෝක ආර්ථිකයේ පෙරගමන්කරුයි. ලෝකයේම අවධානය යොමුව තියෙන්නේ ආසියාව දෙසට.

දෙවනුව, වත්මන් ජාත්‍යන්තර සන්දර්භය තුළ ශ්‍රී ලංකාව නොබැඳි සම දුර විදේශ ප්‍රතිපත්තියක් අනුගමනය කළ යුතුයි. ‘මධ්‍යස්ථභාවය’ යනු වැට උඩ සිටීම නොවෙයි. ප්‍රතිපත්තිමය ස්ථාවරයක් මත පිහිටා කටයුතු කළ යුතු වෙනවා. (Dynamic neutralism)

තුන්වෙනුව, සියලු රටවල් සමඟ මිත්‍රත්තවයෙන් සිටිය යුතු වෙනවා. ඉන්දියාව අපේ නෑදැයා. චීනය අපේ මිතුරා. මිතුරා බොහෝ විට අපට සමීපයි. නෑදෑයින්ට වඩා මිතුරන් පිහිට වූ අවස්ථා තිබෙනවා. සමස්තයක් වශයෙන් ගත් කළ ශ්‍රී ලංකාවේ ජාතික අභිලාෂයන්ට තමයි ඉහළම ප්‍රමුඛතාවය දිය යුත්තේ.

ශ්‍රී ලංකාවේ කොමියුනිස්ට් පක්ෂයට වසර 77ක් සම්පූර්ණ වී තිබෙනවා. ප්‍රධාන අරමුණු දෙකක් මතයි ඔබේ පක්ෂය පිහිටුවන්නේ. ඒ ස්වාධීනත්වය සහ සමාජවාදයයි. ඉතිහාසය දෙස නැවත හැරී බලන විට ඔබේ තක්සේරුව කුමක්ද?

කොමියුනිස්ට් පක්ෂයක අරමුණු දීර්ඝකාලීනයි.

මාක්ස් සහ එංගල්ස් කොමියුනිස්ට් ව්‍යාපාරයේ නිර්මාපකයන්. ඔවුන් අපේක්ෂා කළ වෙනස්කම් දකින්න ඔවුන් ජීවත් වූයේ නැහැ. ඔවුන් සංකල්ප සහ න්‍යායන් තුළින් බුද්ධිමය දායකත්වයන් ලබා දුන්නා. මිනිස් සමාජයේ වෙනස දීර්ඝකාලීන බව ඔවුන් දැන සිටියා.

අපේ පක්ෂයද දීර්ඝ කාලීන අරමුණුවල පිහිටා ගතවූ වසර 77 තුළ විශාල ජයග්‍රහණයන් අපේ සමාජයට ලබා දී තියෙනවා. ඒවා බොහොමයක් ලබා ගත්තේ බලයට පැමිණිලා නෙවෙයි. බලයේ පංගුකාරයන් වීමෙනුත් නෙවෙයි. පංගුකාරයින් වී අප රටට පූර්ණ නිදහස ලබා දුන්නා. සමාජ සංවර්ධනයට විශාල ජයග්‍රහණ ලබා දුන්නා. ජනරජ ව්‍යවස්ථාවක් ලබා දුන්නා. විදේශ වතු, බැංකු ජනසතු කළා. රට කාර්මිකකරණයට අඩිතාලම දැම්මා. සමාජවාදී රටවල් සමඟ සබඳතා ඇති කළා. නොබැඳි විදේශ ප්‍රතිපත්තියකට බලපෑම් කළා. විශ්‍රාම වැටුප්, අර්ථ සාධක ආදී වශයෙන් ශ්‍රමිකයන්ගේ අයිතිවාසිකම් ලබා දුන්නා.  පැවති ඓතිහාසික කොන්දේසි මත සමාජ සංවර්ධනයේ ජයග්‍රහණයන් ලබා දුන්නා. සමාජවාදය යනු දීර්ඝ කාලීන අරමුණක්. එය තීරණය කරනු ලබන්නේ ජගත් සංවර්ධනය මතයි.

සංවාදය - විදුනෙත් සියඹලාපිටිය

වම් ඉවුරේ වෙබ් නාදය