විශේෂඥ වෛද්‍ය ජී. වීරසිංහ මහතා එළඹෙන මහා මැතිවරණයේ දී ශ්‍රී ලංකාවේ කොමියුනිස්ට් පක්ෂයේනි යෝජිතයා ලෙස ශ්‍රී ලංකා පොදුජන පෙරමුණු ජාතික ලැයිස්තුව නියෝජනය කිරීමට එම පක්ෂය විසින් තෝරා ගෙන ඇත. ඒ අනුව ඔහු පසුගිය දා ශ්‍රී ලංකා පොදුජන පෙරමුණු ජාතික ලැයිස්තුව වෙනුවෙන් නාම යෝජනා අත්සන් තැබීය. හිටපු අමාත්‍ය ඩිව් ගුණසේකර මහතාගේ නම මෙවර ජාතික ලැයිස්තුව වෙත ඉදිරිපත්ව නැත.
ජී. වීරසිංහ මහතා ශිෂ්‍ය අවධියේදීම (1975 වසරේදී) දේශපාලන සම්බන්ධතා ඇති කරගනු ලැබුවේ ශ්‍රී ලංකාවේ කොමියුනිස්ට් පක්ෂයට සම්බන්ධ ලංකා ජාතික ශිෂ්‍ය සංගමය සමඟයි. පාසල් අවධියේදීම (1978 වසරේදී) ලංකා කොමියුනිස්ට් තරුණ සම්මේලනයේ සාමාජිකත්වය ලබාගත් ඔහු, කොමියුනිස්ට් පක්ෂයේ සාමාජිකත්වයට පත්වුයේ 1979/1980 දීය. එතැන් පටන් පහු එම පක්ෂයේ අඛණ්ඩ සාමාජිකයෙකු වූයේය. පසුකාලීනව, පක්ෂයේ මධ්‍යම කාරක සභාවට හා දේශපාලන මණ්ඩලයට පත්වූ ඔහු, දැනට එහි ජාත්‍යන්තර කටයුතු පිළිබඳ දෙපාර්තමේන්තුවේ ලේකම්වරයා ලෙස මෙන්ම පක්ෂයේ අධ්‍යාපන දෙපාර්තමේන්තුවේද ක්‍රියාකාරී සාමාජිකයෙකු ලෙස ද කටයුතු කරමින් සිටී. තරුණ ව්‍යාපාරය තුළ ඉදිරියේ සිට ක්‍රියා කොට ඇති ඔහු, කියුබාවේ හා දකුණු අප්‍රිකාවේ පැවැත්වුණු තරුණ හා ශිෂ්‍ය උළෙලවලට සහභාගී වූයේ ලාංකීය නියෝජිත කණ්ඩායමේ ලේකම්වරයා ලෙසය. කලාපීය මෙන්ම ජාත්‍යන්තර රැස්වීම් හා සම්මේලන රාශියකට ඔහු සහභාගී වී ඇත. ශ්‍රේෂ්ට ඔක්තෝබර් විප්ලවයේ ශත සංවත්සරය (2017 වසරේදී) මෙන්ම කාල් මාක්ස් ද්වී ශත සංවත්සරය (2018 වසරේදී) වෙනුවෙන් චීනයේදී මුළුදුන් කොමියුනිස්ට් හා කම්කරු පක්ෂවල ජාත්‍යන්තර සම්මේලනවලට සහභාගී වූ කොමියුනිස්ට් පක්ෂ නියෝජිත කණ්ඩායම්වලට නායකත්වය සැපයුවේ විශේසඥ වෛද්‍ය ජී. වීරසිංහ මහතා ය.
සෞඛ්‍ය දෙපාර්තමේන්තුවේ ජ්‍යෙෂ්ඨ විශේෂඥ වෛද්‍ය ජී. වීරසිංහ මහතා ඉදිරි පාර්ලිමේන්තු මැතිවරණයට ශ්‍රී ලංකා පොදුජන පෙරමුණේ ජාතික ලැයිස්තුවෙන් ඉදිරිපත්වීම සඳහා පසුගිය මාර්තු 11 දා විශ්‍රාම ගනු ලැබුවේ තවත් වසර දෙකකට අධික සේවා කාලයක් ඉතිරිව තිබියදීය.
ඔහු පාසැල් අධ්‍යාපනය ලැබුවේ හම්බන්තොට දිස්ත්‍රික්කයේ උතුරු කනුමුල්දෙණිය මහා විද්යාලයෙදී හා ගාල්ල මහින්ද විද්‍යාලයේදීය. සෝවියට් සංගමයේදී මුලික වෛද්‍ය උපාධිය ලැබූ ඔහු සෞඛ්‍ය දෙපාර්තමේන්තුවට බඳවා ගනු ලැබුවේ 1989 දීය. එතැන් පටන් ඔහු අනුරාධපුර ලේ බැංකුවේ මෙන්ම කොළඹ මහරෝහලේ හදිසි අනතුරු අංශයේද සේවය කළේය. කොළඹ විශ්වවිද්‍යාලයේ පශ්චාත් වෛද්‍ය විද්‍යා උපාධි ආයතනයේ විද්‍යාපති සහ වෛද්‍ය විශාරද උපාධි ඔහු ලබා ගත්තේ පිළිවෙලින් 1997 දී හා 2001 වසර වලදීය. ඉන් අනතුරුව, මහාබ්‍රිතාන්‍යයේ ලන්ඩන් නුවර ඉම්පීරියල් විද්‍යාලයේ ශාන්ත මේරි රෝහලේදී ලිංගිකව සම්ප්‍රේෂණය වන රෝග හා එච් අයි වී වෛද්‍ය විද්‍යාව පිළිබඳව වැඩිදුර පුහුණුව ලැබූ ඔහු, රාජකීය ලන්ඩන් රෝහලේ තව වසරක් සේවය කළේය. ලංකාවට පැමිණීමෙන් අනතුරුව, රාගම හා කළුබෝවිල ලිංගාශ්‍රිත රෝග සායනවල හා ජාතික ලිංගාශ්‍රිත රෝග හා ඒඩ්ස් මර්ධන වැඩ සටහනේ විශේසඥ වෛද්‍යවරයෙකු ලෙස 2004 සිට විශ්‍රාම ගනුලැබූ 2020 මාර්තු 11 දක්වා සේවය කළේය. වසර 2013 සිට 2015 දක්වා ලෝක සෞඛ්‍ය සංවිධානයේ උපදේශකයෙකු ලෙස ඔහු නැගෙනහිර ටිමෝරයේ සේවය කළේය.
ශ්‍රී ලංකා වෛද්‍ය සභාවේ සාමාජිකයෙකු ලෙස 2012 දී ක්‍රියා කල ඔහු, ශ්‍රී ලංකා වෛද්‍ය සංගමයේ උප සභාපතිවරයෙකු ලෙස ක්‍රියා කළේ 2016 දීය. ඔහු ග්ලාස්ගෝ හි කායික හා ශල්‍ය රෝග විශේෂඥ වෛද්‍යවරුන්ගේ රාජකීය විද්‍යාලයේ හා ශ්‍රී ලංකාවේ ලිංගාශ්‍රිත රෝග විශේෂඥ වෛද්‍යවරුන්ගේ විද්‍යාලයේ සම්භාවනීය සාමජිකයෙකු ලෙස පිදුම් ලබා ඇත.
