සමන් ජයකොඩි #

ඉන්දීය අගමැති නරේන්ද්‍ර මෝදි සහ අදානි - අම්භානි සමූහ ව්‍යාපාරයන්ට එරෙහිව ඉන්දීය ගොවි ජනතාවගේ විරෝධතාවය ඉන්දියාවේ ජාතික අර්බුදයක් බවට පරිවර්තනය වෙමින් තිබියදී ඉන්දීය අගමැති නරේන්ද්‍ර මෝදිගේ විශේෂ ඉල්ලීමක් මත ඉන්දියානු ජනතාවගේ චෝදනාවට ලක්ව ඇති අදානි සමූහ ව්‍යාපාරයට කොළඹ වරායේ නැගෙනහිර පර්යන්තය පිරිනැමීමට කටයුතු සිදුවෙමින් ඇතැයි වාර්තා වේ.
ඉන්දියාවේ ආණ්ඩු විරෝධී අරගලයක් බවට පත්ව ඇති මෙම දැවැන්ත ගොවි අරගලය මතුවී ඇත්තේ ඉන්දීය ගොවි ජනතාවගේ හිමිකම් උක්ත අදානි - අම්භානි සමූහ ව්‍යාපාරයන් ඉන්දියානු ආණ්ඩුව සම`ග එක්වෙමින් අහෝසි කරමින් සිටින බවට චෝදනා කරමිනි.

වරාය කම්කරුවන් විසින් තම ශ්‍රමයෙන් සහ වරාය අධිකාරියේ ප්‍රාග්ධනයෙන් නිමාවට පත්වෙමින් තිබෙන කොළඹ වරායේ නැගෙනහිර පර්යන්තය ඉන්දියානු ජනතාවට එපා වී තිබෙන අදානි සමාගමට පැවරීමට එරෙහිව ජාතික මට්ටමේ උද්ඝෝෂණයක් දියත් කරනු ලැබ ඇත. ඒ වෙනුවෙන් ආණ්ඩු පක්ෂය සහ විපක්ෂය නියෝජනය කරන දේශපාලන පක්ෂ මෙන්ම රාජ්‍ය හා පෞද්ගලික අංශවල වෘත්තීය සමිති සිවිල් සංවිධාන එක්ව ‘වරාය සුරැුකීමේ ජාතික ව්‍යාපාරය’ එළඹෙන ජනවාරි 11 වෙනිදා අරඹන බව ස්වාධීන වරාය සේවක සංගමයේ සභාපති ලාල් බංගමුව මහතා ඇත්තට පැවසීය.

ආරක්ෂක අමාත්‍යාංශයේ ජාතික ආරක්ෂක බුද්ධි මණ්ඩලයේ සාමාජිකයෙකු රටේ නොබැද පිළිවෙතටත් චීනය සමඟ ඇති රාජ්‍ය තාන්ත‍්‍රික සබඳතා හා මිත‍්‍රත්වයට හානිදායක විග්‍රහයක යෙදෙමින් රජයට අයත් ඉංග්‍රීසි පුවත්පතකට සපයා ඇති ලිපිය රජයේ අදහස නම් එය විමතියට කරුණක් බව, ශ්‍රී ලංකාවේ කොමියුනිස්ට් පක්ෂයේ හිටපු ප්‍රධාන ලේකම්, හිටපු විදේශ කටයුතු භාර වැඩබලන ඇමැතිවරයකු වූ ඩිව් ගුණසේකර මහතා ඇත්තට විශේෂ ප්‍රකාශයක් කරමින් කියා සිටී. 

ඔහු ප්‍රකාශ කරන පරිදි රජයට අයත් ඉංග්‍රීසි පුවත්පතක් වන ”ඩේලි නිවුස්” පුවත්පතේ 2020.12.22 දින ආරක්ෂක අමාත්‍යාංශයේ ජාතික ආරක්ෂක බුද්ධි මණ්ඩලයේ (Think Tank) සාමාජිකයෙකු සහ පර්යේෂණ අධ්‍යක්ෂකවරයා වන අසංග අබේගුණසේකර නමින් ඉන්දු පැසිපික් කලාපයේ නව සීතල යුද්ධය මැයෙන් සපයා ඇති ලිපියට අනුව චීනයට එරෙහිව ‘නීතිය පදනම් කොට ගත් සහ බෙදාගත හැකි සාරධර්ම’ මත පදනම් වන සංවිධානයක අවශ්‍යතාවය සාධාරණීය කිරීමට ලියුම්කරු ඉතිහාසයේ සහ පවතින්නාවූ භූ දේශපාලනික සාධක උපුටා දක්වා ඇත. එම සංකල්පයේ වැදත්කම ශක්තිමත් කරලීමට ඔහු උපුටා දක්වන්නේ ඇමෙරිකානු නාවික හමුදාවේ අද්මිරාල් පිලිප් එස්. ඩේවිඩ්සන්ගේ කතාවකි. එම කතාව මෙසේය.

”මාල දිවයින සහ ඇමෙරිකාව අතර සහයෝගීතාවය සහතික කරලීමට ආරක්ෂක රාමුවක සහයෝගීතාවයක් ඇති කරනු ලැබීය. මේ සඳහා ඉන්දියාවේ සහයෝගය ලැබීම ආදර්ශමත්ය. මේ අනුව මලබාර් නාවික යුද්ධ අභ්‍යාසය පවත්වනු ලැබීය. ඊට සහභාගි වීමට ඉන්දියාව, ජපානය සහ ඕස්ට්‍රේලියාවද එක්වීම ගනු ලැබු ඉදිරි පියවරකි. චීනය වැනි ආක්‍රමණිකයෙකුට එරෙහිව මෙම සන්ධානයට එක්වීමට අවස්ථාව එළඹී ඇත.”

මේ අනුව ගුණසේකර මහතා පහත ප්‍රශ්න කිහිපයක් යොමු කරන බවට ප්‍රකාශ කළේය.
1. අසංග අබේගුණසේකර මහතා තවමත් ආරක්ෂක අමාත්‍යාංශයේ බුද්ධි මණ්ඩලයේ සාමාජිකයෙක්ද? එහු එහි අධ්‍යක්ෂකවරයෙක්ද?
2. එහු පෞද්ගලිකව කුමන දේශපාලන මත දැරුවද? විදේශ කටයුතු අමාත්‍යාංශයේ නිලයක් දරමින් විදේශ සහ ආරක්ෂක ප්‍රතිපත්තිමය ප්‍රශ්න ගැන රජයේ පුවත්පතකට තම පෞද්ගලික මත ඉදිරිපත් කළ හැකිද?
3. ඔහුගේ ලිපියේ දැක්වෙන කරුණු ආරක්ෂක අමාත්‍යාංශය හා විදේශ කටයුතු අමාත්‍යාංශය අනුමත කරන්නේද?

පැහැදිලිවම ඇමෙරිකාවේ රාජ්‍ය දෙපාර්තමේන්තුවේ න්‍යාය පත්‍රයට අනුව යෝජිත චීනයට එරෙහි සංවිධානයට ශ්‍රී ලංකාව ඈදාලීමට ජනමතය ගොඩ නැගීමට මේ අධ්‍යක්ෂවරයාට කොන්ත‍්‍රාත්තුව ලබා දී තිබේද? යන්න ගුණසේකර මහතා ප්‍රශ්න කරයි.

වෙනස් වී ඇති ලෝක ආර්ථික රටාව සහ ලෝක බලතුලනය පිළිබඳව වූ යථාර්ථය ගැන අවබෝධයකින් තොරව ඉතිහාසයේ අත්දැකීම් නොතකා හුදෙක් අධිරාජ්‍යවාදීන්ගේ න්‍යාය පත‍්‍රයට අනුව ක්‍රියා කරන ඊනියා බුද්ධිමතුන් අපේ රටේ අමාත්‍යාංශවල උපදේශකයන් පර්යේෂකයින් කිරීම රටේ අවාසනාව බව ගුණසේකර මහතා වැඩිදුරටත් ප්‍රකාශ කළේය.