Saturday, 08 May 2021

EDITORIAL

පසුගිය යහපාලන ආණ්ඩුව යටතේ මෙන්ම වත්මන් ගෝඨාභය රජය යටතේ ද නීතියේ ආධිපත්‍ය ක්‍රියාවලියට මහත් සේ බාධාවක් වී ඇත්තේ විලාසිතාවක් මෙන් පැන නැගී ඇති 'වොයිස් කට්' දේශපාලනඥයන් ය.

පැමිණිල්ලක් ඉදිරිපත් කිරීම සෑම පුරවැසියෙකුම සතු අයිතියකි. එම පැමිණිල්ල අප්‍රමාදව විභාග කිරීම පොලීසිය සතු වගකීමකි. එම ක්‍රියාවලියේ මීළඟ අදියර පැවරෙන්නේ නීතිපති දෙපාර්තමේන්තුවට ය. එම පැමිණිල්ල අධිකරණය වෙත යොමු කිරීම නීතිපතිගේ වගකීම ය.

මෙම ක්‍රියාවලිය අතරතුර එය යටපත් කිරීමට හෝ එය වේගවත් කිරීමට සූදානම් 'රෙඩිමේඩ්' කල්ලි සමාජය තුළ පැනනැගී තිබේ. ඒවා දැන් දිනපතා දකින මාධ්‍ය සංදර්ශන වී තිබේ. විද්‍යුත් ජනමාධ්‍ය අයිතිකරුවන්ට තම ආදායම වැඩි කරගැනීමට ද මේවා හොඳ ප්‍රවෘත්ති ය. පැය භාගයක ප්‍රවෘත්ති විකාශ තුළ තිබෙන්නේ වෙළඳ දැන්වීම් සහ මෙකී 'වොයිස් - කට්' ය.

මේවාට රුචි වොයිස් - කට් දේශපාලනඥයින් රැසක් බෝවී තිබේ. ඔවුන්ගේ රැකියාව වී ඇත්තේ වොයිස් කට් සැපයීම ය.

පසුගිය සතියේ 'ස්විස් තානාපති' ගානියර් නාටකය එක් අවස්ථාවකි. රාජිත සේනාරත්නගේ කිඹුල් නාටකය තවත් අවස්ථාවකි.

දැන් වොයිස් - කට් දේශපාලනඥයන් සහ වොයිස් - කට් මාධ්‍යවේදීන් රහස් පොලීසිය, අධිකරණය, පොලීසිය ඉදිරිපිට පදිංචි වී සිටිති. නීතිය ක්‍රියාත්මක වීමට මේ වොයිස් - කට් දේශපාලනඥයන් බාධකයක් නොවුනා වුවද සමාජයට කරච්චලයකි.

තමන්ගේ මුහුණු, මුහුණු පොතේ දමා ගැනීමට හෝ විද්‍යුත් මාධ්‍යයේ ප්‍රවෘත්ති තුළින් ඉදිරිපත් වීමට මාන බලා සිටින කල්ලි බිහිවී තිබේ. ඒ අතර භික්ෂූන් වහන්සේලා ද වේ. ඔවුන්ගේ ජොබ් එක මෙම මාධ්‍ය කොන්ත්‍රාත් ය. ලියාපදිංචි නොවූ නව දේශපාලන කල්ලි ද බිහිවී තිබේ.

පැමිණිලිවලට අවහිර කිරීම මෙන්ම පැමිණිලිවලට බලපෑම් කිරීම යන දෙකම නීතියේ ආධිපති්‍යට මහත් බාධාවකි. දැන් මීට නීතිඥයන් ද ඇතුළත් වී තිබේ. තම වෘත්තීය ප්‍රචාරය කරගැනීමට ඇතැම් නඩු නැති නීතිඥයෝ 'වොයිස් - කට්' කණ්ඩායමට දැන් එකතු වී තිබේ.

මෙම තත්ත්වය තුළ යහපාලනයක් අපේක්ෂා කළ හැකි ද?

1964 දෙසැම්බර් මස සිට අද දක්වා පුරා දශක පහමාරක කාලයකි. මේ කාලය මුළුල්ලේ ම ලාංකේය පුවත්පත් මාධ්‍ය ක්ෂේත්‍රය තුළ යම් තීරණාත්මක කාර්යභාරයක් ඉටුකළ ‘ඇත්ත’ පුවත්පතක් ලෙස මුද්‍රණය තීරණාත්මක ලෙස අවසන්ව මාස දෙකකට ආසන්න කාලයක් ගතව ඇති බව රහසක් නොවේ. එම දශක පහකට මදක් වැඩි කාලය පුරාම ‘ඇත්ත’ මෙරට සමස්ත ප්‍රගතිශීලී ජනතාවගේ පොදු වේදිකාවක් බවට පත්ව තිබුණි.

වත්මන් යුගය සියල්ල මුදල් මත තීරණය වන අවධියක් බව පුන පුනා ප්‍රකාශ කළ යුතු නැත. අප ගෙවන මේ ගෝලීය - ලංකා යුග නිමේෂයේ මාධ්‍ය බහුතරයක් මත ඇතිව ඇති තත්ත්වය ද එය ම ය. එනම් මාධ්‍ය ප්‍රාග්ධනය මගින් තවදුරටත් යථාර්ථය නියෝජනයක් සිදු වන්නේ නැත. සිදුවෙමින් ඇත්තේ එම මාධ්‍ය ප්‍රාග්ධනය මගින් යථාර්ථය ගොඩ නැංවීම ය. මේ වටපිටාව තුළ මුද්‍රිත මාධ්‍ය සලකා බැලුව ද පුවත්පතෙහි සඳහන් කරන මිලෙන් පමණක් පුවත්පතක් පවත්වාගත නොහැකි බව වහා පෙනෙන්නකි. දැන්වීම් අනුග්‍රහයන් නොමැතිව පුවත්පතක් පවත්වාගෙන යාම කළ නොහැක්කක් බව ‘ඇත්ත’ හමුවේ යළිදු පසක් විය.

එහෙත්, පුවත්පතක් ලෙස මුද්‍රණය අවසන් කළ ද ‘ඇත්ත’ විශ්වාස කළ වඩා යහපත් අනාගතය වෙනුවෙන් ඉදිරියටත් ක්‍රියාශීලීව මැදිහත් නොවී සිටීම ද කළ හැක්කක් නොවේ. අප හමුවේ ඇති විකල්පයන් මොනවා ද? ඇත්තේ අපි පසුගිය දින කිහිපය පුරා විමසා බැලුවේ එයයි.

පසුගිය වසර පනස් පහ යනු ‘ඇත්ත’ සිය සලකුණ සනිටුහන් කළ, සිදුවී අවසන් වූ අතීතයයි. ඇත්ත අපි අනාගතය වෙත ගමන් කිරීමට තීරණය කළෙමු. මේ ලියැවෙන්නේ ඇත්ත නව මාධ්‍ය වෙත ඇත්ත අන්තර්ජාල සංස්කරණයක් වෙත පියමන් කරන බවට වූ සටහනයි. එය අභියෝගයකි.

තමා ජීවත්වන සමාජයේ “ඇත්තටම සිදුවන්නේ කුමක් ද” යන්න අවබෝධ කරගැනීමේ අවශ්‍යතාවය අද වඩාත් ඉස්මතුව ඇත. උදාහරණ කිහිපයක් සැලකිල්ලට ගනිමු. පසුගිය කාලය පුරා සැලකියයුතු ආර්ථික වර්ධනයක් සිදුව ඇතැයි කියතත් මෙරට ආර්ථිකයේ වර්ධනාත්මක ගමන් දිශාව නිවැරදි ද? නිවැරදි නොවේනම් ඊට විකල්ප වියයුත්තේ මොනවා ද? රටේ ජනගහනයෙන් බහුතර පිරිසක් මහත් වූ ආර්ථික අපහසුතාවයන්ට ලක්ව දුෂ්කර ජීවිත ගත කරමින් සිටින්නේ මක් නිසා ද? ඇති - නැති පරතරය පුළුල් වෙමින් පවතින්නේ මක් නිසා ද? ජාතික ප්‍රශ්නයට තිරසාර විසඳුමක් ලැබී ඇතැ යි සෑහීමකට පත් වෙන්නට හැකි ද? යුද්ධය අවසන්ව කලක් ගතව ඇතත් නැවත යුද්ධයක් ඇතිවෙතැයි සමාජයේ බිය මුසු හැඟීමක් ඇතිවෙමින් පවතින්නේ කාගේ වරදින් ද? සංහිඳියාව වෙනුවට ආගමික අන්තවාදයන්, ජනවර්ගවලට එරෙහි අන්තවාදයන් උත්සන්න වෙමින් පවතින්නේ මක් නිසා ද? මේ සියල්ල ඇති වන්නේ ඇයි?

මෙවන් වූ වටපිටාවක් නිර්මාණය වී ඇති ඇත්ත හේතු පිළිබඳ අවධානය යොමු කිරීම ඒවා විසඳා ගැනීමට අත්‍යවශ්‍ය පූර්ව කොන්දේසියකි. එය එසේ වුවත් අද වන විට ඇත්ත සොයා ගැනීමත් එම ඇත්ත හෙළි කිරීමත් දුෂ්කර ව්‍යායාමයක් බවට පත්ව ඇත. මෙවන් පරිසරයක ‘ඇත්ත’ වැනි මාධ්‍යයක අවශ්‍යතාවය තීරණාත්මක ය.

‘ඇත්තට’ පුද්ගලික සතුරන් හෝ මිතුරන් නැත. ඇත්ත අපක්ෂපාතී ද නැත. එය ප්‍රජාතන්ත්‍රවාදයට පක්ෂ ය. ඒකාධිපතිවාදයට, අධිකාරිවාදයට හා දූෂණයට සතුරු ය. අවිද්‍යා අන්ධකාරය දුරලීම සඳහාත්, විද්‍යාලෝකය පැතිරවීම සඳහාත් කළ යුතු සියල්ල වෙනුවෙන් www.aththa.lk ඉදිරියටත් පෙනී සිටී.

වම් ඉවුරේ වෙබ් නාදය