පවතින වත්මන් කොරෝනා වසංගත තත්ත්වය හමුවේ නව ලිබරල් වාදය අසාර්ථක බව තව තවත් ඔප්පු වෙමින් ඇති අවස්ථාවක විකල්ප ආර්ථික උපාය මාර්ගයක් වෙනුවෙන් සටන් කළ යුතු යැයි ශ්‍රී ලංකාවේ කොමියුනිස්ට් පක්ෂය අවධාරණය කරයි. පක්ෂයේ ප්‍රධාන ලේකම් හිටපු අමාත්‍ය ඩිව් ගුණසේකර මහතාගේ අත්සනින් නිකුත් කර ඇති මැයි දින ප්‍රකාශනයේ ඒ බව සඳහන්ය.
1977 සිට ගතවූ වසර 43 තුල කම්කරු පන්තිය ඇතුළු වැඩකරන ජනතාවගේ අයිතීන් උදුරා ගනිමින් කම්කරු පන්ති ව්‍යාපාරයම දුර්වල කරමින් ක්‍රියාත්මක කරනු ලැබූ නවලිබරල්වාදී ආර්ථික උපායමාර්ග අද රට උග්‍ර අර්බුදයකට පත්කොට ඇතැයිද ලෝක ව්‍යාප්ත “කොරෝනා” වසංගතය තුළින් නවලිබරල්වාදයේ නොහැකියාව සහ අසාර්ථකත්වය ලොවට ප්‍රත්‍යක්ෂ ලෙස අනාවරණය කරනු ලැබ ඇති බවයි ද අවධාරණය කර සිටින ශ්‍රී ලංකාවේ කොමියුනිස්ට් පක්ෂය ලෝක රටාවේ සහ ලෝක බල තුලනයේ ප්‍රබල වෙනසකට තුඩු දෙන්නාවූ පසුබිමක, විකල්ප ආර්ථික උපාය මාර්ගයක අවශ්‍යතාවය පන නැගෙමින් තිබේ. මෙම තත්ත්වය තුළ කම්කරු පන්තිය ප්‍රමුඛ වැඩකරන ජනතාවගේ භූමිකාව තීරණාත්මක වනු ඇතැයි ප්‍රකාශ කර සිටී.
සම්පූර්ණ මැයි දින ප්‍රකාශය පහත පරිදිය
ශ්‍රී ලංකාවේ කොමියුනිස්ට් පක්ෂයේ මැයි දින ප්‍රකාශය
2020 මැයි දිනය, 130 ජාත්‍යන්තර කම්කරු දිනයයි. “මැයි දිනය” වශයෙන් හැඳින්වෙන ලෝක කම්කරු දිනය ලොව පුරා වර්ණවත් ලෙස සැමරීම ආරම්භවුයේ 1890 සිටය.
ජාත්‍යන්තර කොමියුනිස්ට් ව්‍යාපාරයේ දෙවන ජාත්‍යන්තරයේ පළමු සමුළුව වෙත ෆ්‍රෙඩ්රික් එංගල්ස් විසින් ඉදිරිපත් කරන ලද යෝජනාවකට අනුව 1886 ඓතිහාසික කම්කරු අරගලය සැමරීම ලෝක කම්කරු දිනය හෙවත් මැයි දිනය බවට පත්විය.
එම දිනය, ශ්‍රී ලංකාවේ 1933 සිට සමරනු ලැබේ. 130 වරට සමරනු ලබන ලෝක කම්කරු දිනයේදී, ශ්‍රී ලංකාවේ කම්කරු පන්තිය ප්‍රමුඛ වැඩකරන ජනතාවගේ උණුසුම්, විප්ලවීය මැයි දින සුබ පැතුම් ලෝක කම්කරු ජනතාව වෙත පිරිනමනු ලැබේ. ශ්‍රී ලංකාවේ කොමියුනිස්ට්වරු 1933 සිට අඛණ්ඩව මෙම ලෝක කම්කරු දිනය සමරති.
මැයි දිනයේ ආරම්භයේ සිට ගතවූ වසර 130 තුළ, ලෝකය ප්‍රබල ලෙස වෙනස්වී ඇත. එම කාලය තුළදී මිනිස් සමාජයේ ඉදිරිගමන වෙනුවෙන් මුළු මහත් කම්කරු පන්තිය විසින් ඉටුකර ඇති කාර්යභාරය, ලබාදුන් නායකත්වය සහ දායකත්වය අපි මහත් ආඩම්බරයෙන් සිහිපත් කරමු. කම්කරු පන්තියේ අයිතීන් වෙනුවෙන් දියත් කරනු ලැබූ අරගල මෙන්ම ඒ වෙනුවෙන් ජීවිත පරිත්‍යාග කල සහ විවිධ වධ වේදනා විඳි කම්කරු පන්තියේ සටන් වීරයින් අපි කෘතවේදී ගෞරවයෙන් සිහිපත්කරමු.
2020 වසරේදී 130 වන ජාතන්තර කම්කරු දිනය සමරනු ලබන්නේ මුළු ලොවම සහ සෑම රටක්ම “කොවිඩ් - 19” වශයෙන් හැඳින්වෙන කොරෝනා වෛරසයෙන් අකර්මන්‍ය කර ඇති අවස්ථාවකය. මිනිස් ඉතිහාසයේ මහා ඛේදවාචකයකට ලෝක ජනතාව ගොදුරුවී ඇති අවස්ථාවකය. මාස සතරක් තරම් කෙටිකාලයක් තුළ ලක්ෂ ගණනක් ශ්‍රමික ජනතාවක් ජීවිත අහිමිකරගෙන ඇති අවස්ථාවකය. තවත් ලක්ෂ ගණනක් වදවේදනා දරමින් රෝහල්වල ජීවිත ගතකරන අවස්ථාවකය. කෝටි සංඛ්‍යාත ජනතාවකට තම රැකියා සහ ජීවන මාර්ග අහිමි වී ඇති අවස්තාවකය.
සමස්ත ලෝක ජනතාව “කොරෝනා” නම් නව අභියෝගයට මුහුණ දී ඇත්තේ නව ලිබරල්වාදයේ ඵල විපාක වශයෙන් ගෝලීය අභියෝග රැසකට මුහුණ දෙමින් සිටියදීය. ලෝක ධනවාදයේ නවලිබරල් අවධියේදී ගතවූ වසර 40 තුළ ගෝලීය උෂ්ණත්වය, ගෝලීය ත්‍රස්තවාදය, ගෝලීය මුල්‍ය අර්බුදය, සංක්‍රමික සහ සරණාගත අර්බුදය, දරිද්‍රතාවය සහ සමාජ අසමානතාවය ආදී ප්‍රබල අභියෝග රැසකට ලෝක ජනතාව මුහුණපා සිටිති.
1886 මැයි අරගලයෙන් ලබාදුන් කම්කරු පන්තියේ අයිතීන් සහ සෙසු ජයග්‍රහණයන් තර්ජනයකට ලක්වී සිටින මෙම අවස්තාවේදී, එකී ගෝලීය අභියෝගයන් ජනිත කළ නවලිබරල්වාදයට එරෙහිවූ වත්මන් අරගලයේ යෙදී සිටින ලෝක කම්කරු පන්ති ජනතාවට අපි අපේ සහෝදරාත්මක සහයෝගය පළකර සිටිමු. එකී අභියෝගයන්, අවස්තාවන් බවට පත්කර ගැනීමට අපි අදිටන් කරමු.
1977 සිට ගතවූ වසර 43 තුල කම්කරු පන්තිය ඇතුළු වැඩකරන ජනතාවගේ අයිතීන් උදුරා ගනිමින් කම්කරු පන්ති ව්‍යාපාරයම දුර්වල කරමින් ක්‍රියාත්මක කරනු ලැබූ නවලිබරල්වාදී ආර්ථික උපායමාර්ග අද රට උග්‍ර අර්බුදයකට පත්කොට ඇත. එය ලෝක මට්ටමින් සිදුවන ප්‍රපංචයකි. ලෝක ව්‍යාප්ත “කොරෝනා” වසංගතය තුළින් නවලිබරල්වාදයේ නොහැකියාව සහ අසාර්ථකත්වය ලොවට ප්‍රත්‍යක්ෂ ලෙස අනාවරණය කරනු ලැබ ඇත.
ලෝක රටාවේ සහ ලෝක බල තුලනයේ ප්‍රබල වෙනසකට තුඩු දෙන්නාවූ පසුබිමක, විකල්ප ආර්ථික උපාය මාර්ගයක අවශ්‍යතාවය පන නැගෙමින් තිබේ. මෙම තත්ත්වය තුළ කම්කරු පන්තිය ප්‍රමුඛ වැඩකරන ජනතාවගේ භූමිකාව තීරණාත්මක වනු ඇත.
2019 නොවැම්බර් 16 ජනාධිපතිවරණයෙන් පසු උදාවී ඇති නව දේශපාලන වර්ධනයන් තුළද විකල්ප ආර්ථික උපාය මාර්ගයක අවශ්‍යතාවය විශේෂයෙන්ම වත්මන් ජාත්‍යන්තර සන්දර්භය හමුවේ මතුවී තිබේ. එම භූමිකාව සඳහා වාමගාමී, රැඩිකල් සහ ප්‍රගතිශීලී බලවේගයන්ගේ සටන් සමගිය සහ එක්සත් ක්‍රියාකාරීත්වය අනීවාර්ය අවශ්‍යතාවයකි.
130 වන ජාත්‍යන්තර මැයි දිනයේදී, ජාත්‍යන්තර සහ ජාතික අභියෝගයන් හමුවේ තම පන්තිමය කාර්යභාරයන් සපුරාලීමට කැපවෙන බවට ශ්‍රී ලංකාවේ කොමියුනිස්ට් පක්ෂය ප්‍රකාශ කර සිටී.
