- විදෙස්
- Posted On
ෂෙන්චෙන් - 40 වසරක ප්‍රාතිහාර්ය
චීනය පිබිදීමේ ප්‍රාතිහාර්ය ලෙස සැලකෙන්නේ දකුණු දිග චීනයේ ගුවාන්ඩොංග් පළාතේ පිහිටි ධීවර ගම්මානයක් වූ ෂෙන්චෙන් පසුගිය වසර 40 තුළ නවීනත්වයේ, ජන ජීවිතයේ සහ පාරිසරික ස්ථායිතාවයේ දැවැන්ත නගරයක් හා ආර්ථිකයක් බවට සිදුවූ පරිවර්තනයයි.
චීනයේ පළමු විශේෂ කාර්මික කලාපය ලෙස 1980 මැයි මාසයේ චීනයේ ප්‍රතිසංස්කරණ හා විවෘත කිරීම ආරම්භ වූයේ ෂෙන්චෙන් ප්‍රදේශයේය. ‘වෙළෙදපොළ’ ක්‍රමය හඳුන්වා දෙනු ලැබුවේ එම ප්‍රතිසංස්කරණයන් සමඟිනි. ආර්ථික ප්‍රතිසංස්කරණයන් හඳුන්වාදීමේ 40වන සංවත්සරය ෂෙන්චෙන් හිදී පැවැත්වුණු අතර චීන කොමියුනිස්ට් පක්ෂයේ ප්‍රධාන ලේකම් හා චීන ජනාධිපති ක්සි ජී පින් සහභාගි වූ අතර තවදුරටත් චීන ආර්ථිකය විවෘත කිරීමේ ක්‍රියාමාර්ගය ඉදිරියටම ගෙන යන බව ඔහු එහිදී ප්‍රකාශ කළේය. මෙහිදී ඔහු පළ කළ අදහස් වැදගත් වන්නේ චීන කොමියුනිස්ට් පක්ෂයේ මධ්‍යම කාරක සභාව දින කිහිපයක් තුළ රැස් වන්නට නියමිත වීම හා එහිදී ඉදිරි පස් අවුරුදු සැලැස්ම සාකච්ඡා වීමට නියමිත බැවිනි.
ෂෙන්චෙන් යනු අද චීනයේ බීජිං හා ෂැංහයිවලට පසු විශාලතම නගරයයි. චීනයේ වඩාත්ම පොහොසත් තරුණ හා අධ්‍යාපනික වශයෙන් ඉදිරියෙන් සිටින ෂෙන්චෙන් නගරය පිහිටි ගුවන්ඩොංග් පළාත හොං කොං හා මැකා ඕ ඇතුළත් ‘මහා සමුද්‍රීය කලාප’ සංවර්ධන සැලැස්ම මෙම 40වන සංවත්සරය හරහා ඉදිරියට ගෙන යනු ඇත. හොං කොං චීන ප්‍රධාන භූමිය සමඟ ඒකාග්‍රතාව තහවුරු වීම මහා සමුද්‍රීය කලාප සැලැස්ම තුළින් අපේක්ෂා කෙරේ.
වර්තමාන ෂෙන්චෙන් නගරය මිලියන 13ක ජනගහනයකින් යුක්තය. 1980 සිට 2019 වන විට මෙම නගරයේ දළ දේශීය නිෂ්පාදනය යුවාන් මිලියන 270 සිට යුවාන් ට්‍රිලියන 2.7ක් (ඩොලර් මිලියන 40 සිට ඩොලර් බිලියන 400) දක්වා වැඩි වූ අතර පසුගිය වසරවල වාර්ෂික වර්ධන වේගය 20.7ක මට්ටමකට පැවතුණි. වසර 1981 දී නගරයේ අනායන හා අපනයන ප්රමාණය ඩොලර් මිලියන 18ක් වූ අතර 2019 දී එය ඩොලර් බිලියන 431.5ක් විය.
ෂෙන්චෙන් ජනතාවගේ ජීවන මට්ටම, අධ්‍යාපනය, සෞඛ්‍ය සේවා, නිවාස හා පාරිසරික සංවර්ධනය දැවැන්ත ඉදිරි ගමනක් පෙන්නුම් කර ඇත. ෂෙන්චෙන් 40වන සංවත්සර උත්සවය අමතමින් චීන කොමියුනිස්ට් පක්ෂයේ ප්‍රධාන ලේකම් හා චීන ජනාධිපති ක්සි ජින් පින් සංවර්ධනය මූලික වශයෙන් වැදගත් කරුණ බවත් සෑම ක්ෂේත‍්‍රයකම විවෘත භාවය රැකගනිමින් තමන් වෙත ආකර්ෂණය කර ගැනීමට පිටතට ගොස් තරගකාරී වන්නටත් දිගින් දිගටම ක්‍රියා කළ යුතුව ඇති බව පෙන්වා දුන්නේය. තාක්ෂණ විප්ලවය සහ කාර්මික පරිවර්තනය සඳහා නව නිර්මාණ ගාමක බලවේගය කරගත යුතු බව පෙන්වා දුන් ක්සි ජින් පින් සංවර්ධන සංකල්පයේ පදනම විය යුත්තේ ජනතාව මුල් වූ දර්ශනයක් බව ප්‍රකාශ කළේය. නීතියේ පාලනය ශක්තිමත් කළ යුතු බව පෙන්වා දුන් ක්සි ජින් පින් පරිසර සංරක්ෂණය සහිත තිරසර සංවර්ධන ප්‍රතිපත්තියක දිගටම ගමන් කළ යුතු බවත් පෙන්වා දුන්නේය. මහා සමුද්‍රීය කලාප සැලැස්ම තුළ තනි රටක්, ක්‍රම දෙකක් සංකල්පයේ තිරසාර ලෙස සිටිය යුතු බව පෙන්වා දුන්නේ හොං කොං හා මැකා ඕ එම කලාපය තුළ සිටින වෙනස්කම් සහිත ප්‍රදේශ දෙකක් බැවිනි.
මෙම මහා සමුද්‍රීය කලාපයේ සංවර්ධනයේ එංජිම වනු ඇත්තේ ෂෙන්චෙන් බව පෙන්වා දුන් ක්සි ජින් පින් මෙය ලෝකයේ සෑම අතින්ම වඩාත් දියුණු සමුද්‍රීය කලාපය ලෙස සංවර්ධනය විය යුතු බව පෙන්වා දුන්නේය.
