ස්වාධීන වරාය සේවක සංගමයේ සභාපති ලාල් බංගමුවගේ
....................................
සාකච්ඡා කළේ - සමන් ජයකොඩි
....................................
මොනවද මේ දවස්වල වෙන්නේ?
ආණ්ඩුව රටේ සම්පත් කුණු කොල්ලයට විකුණමින් ඉන්න අතර රටේ ජනතාවට තමන්ට අවශ්‍ය ආහාර ප්‍රමාණය ලබා ගන්නවත් බැරි තත්ත්වයක් උදා කරමින් තියෙනවා. පෝලිම් ඇවිත් තියෙනවා. මිනිස්සුන්ට සල්ලි නැත්තං අපිට කරන්න දෙයක් නෑ කියලා ආණ්ඩුව කියනවා. නමුත් මේ අය ඒවා කියල නෙවෙයි ආණ්ඩුව ගත්තේ. ආණ්ඩුව ගත්තේ සෞභාග්‍යමත් රටක් හදන්නම් කියලා. ආණ්ඩුව කියනවා කොවිඞ් නිසා මේ තත්ත්වය ඇති වුණා කියලා. නමුත් කොවිඞ් මුළු ලෝකයටම තිබුණු ප්‍රශ්නයක්. අපේ රටේ නිදහසින් පස්සේ පත්වුණු පාලකයෝ තමයි මේ රට මේ තත්ත්වයට ගෙනාවේ.
ජාතික සම්පත් විකිණීමට විරුද්ධව වෘත්තීම සමිති ඒකාබද්ධ පෙරමුණක් සකස් වෙලා තියෙනවා?
ඔව්. තෙල්, වරාය සහ විදුලි වෘත්තීය සමිති එකතු වෙලා එක් වෙලා ඒකාබද්ධ සංවිධානයක් හදල තියෙනවා. ඒකේ ක්‍රියාකාරකම් දැනටමත් සිදුවෙමින් තියෙනවා. විශේෂයෙන් මේ ආයතන තුනේ සේවකයෝ රටේ ජාතික සම්පත් විකිණීම කියන කාරණය ගැන අද අවදියෙන් ඉන්නවා. ජාතික සම්පත් බේරගන්න විදුලි බල මණ්ඩලය වර්ජනයකට යන්න සූදානමින් ඉන්නවා. නමුත් රටේ ජනතාවට ඉන්න අපහසුතාවය සලකල තමයි අපි තවමත් නිහඩව ඉන්නේ. නමුත් ආණ්ඩුව වෘත්තීය සමිතිවලට ඇහුම්කන් නොදී මේ කටයුතු කරමින් ඉන්න ආකාරය නිසා ඉදිරියේදී දැඩි වෘත්තීය ක්‍රියාමාර්ගවලට යන්නට වේවි.
ජාතික සම්පත් විකිණීම කියන්නේ?
ආණ්ඩුව එල්එන්ජී ගෑස් ඒකාධිකාරයක් ඇතිවෙන පරිදි ඒ ගනුදෙනුව කරමින් ඉන්නවා. තෙල් සංස්ථාවේ ටැංකි ටික විකුණන්න හදනවා. රටක බලශක්තිය සැපයීම කියන්නේ රටේ සෑම දේටම බලපාන මූලික දෙයක්. එහි ඒකධිකාරය එක් සමාගමකට නැත්නම් ඇමරිකාවට පැවරීම අනාගතයේ අපිට ප්‍රශ්න රාශියක් ඇති කරන්න පුළුවන් කාරණයක්. බලශක්ති ඒකාධිකාරය එක් රටකට දෙනවා කියන්නේ අපේ ආර්ථිකයේ ස්විච් එක ඔවුන්ට දීමක්.
ඒ වගේම වරායේ අක්කර දහතුනක ඉතාමත් වටිනා ඉඩමක් විකුණා දමන්න සූදානම් වෙනවා. ඒ ඉඩම එක් පැත්තකින් කොළඹ වරාය නගරයට මායිම් වෙනවා. අනික් පසින් චීන සීඅයිසීටී ජැටියට මායිම් වෙනවා. මේ ඉඩමේ සාමාන්‍ය වටිනාකම පර්චර්ස් එකක් කෝටි දෙක හමාරක් විතර. මෙතරම් වටින බිම විතරක් නෙවෙයි බිමත් සමග එහි සිදුවන ප්‍රති අපනයන කටයුතුත් ඒවායින් ලැබෙන ඩොලර් ආදායමත් සමගයි මේ චීන සීඅයිසීටී සමාගමටම මේක විකුණන් හදන්නේ. මේක විකුණනේ ඉඩමේ වටිනාකමටත් වඩා අඩු මුදලකට. මීට පෙර මීට වඩා කුඩා ඉඩම් සමාගම්වලට දීලා මේ ගන්න හදනවට වඩා වැඩි මුදලක් මීට අවුරුදු දහයකට කලිනුත් අරන් තියෙනවා. ඒ නිසා මේ දූෂිත ගනුදෙනු නතර කළ යුතුයි.
අපි වෙන් වෙන් වශයෙන් සිටින තාක් පාලකයන්ට මේ සම්පත් විකිණීම පහසුවක් වෙන බව අපි කල්පනා කළා. විශේෂයෙන් අපිට නැගෙනහිර පර්යන්තය බේරා ගැනීමට හැකියාව ලැබුණේ මේ රටේ සියලූ පාර්ශ්ව එදා එකතු වුණු නිසයි. ඒ නිසා එකතුවීම අවශ්‍ය වුණා. නමුත් මේ ආණ්ඩුව තවමත් ඔවුන්ගේ ක්‍රියාකලාපය වෙනස් කරල නැහැ. ඒ නිසා වැඩකරන පන්තියට තමන්ගේ බලය නැවතත් පෙන්නන්න සිදු වේවි.
පසුගිය කාලයේ නැගෙනහිර ජැටිය බේරා ගැනීමට ඒ වෙනුවෙන් වූ වෘත්තීය අරගලයට හැකියාව ලැබුණා. අද ගුරු වෘත්තීය සමිති ඔවුන්ගේ ඉල්ලීම් දිනා ගනිමින් ඉන්නවා. මේවා සුබවාදී ප්‍රවණතා නේද?
ගුරුවරුන්ගේ ගැටළුවේදී මේ ආණ්ඩුව කටයුතු කළේ කොහොමද? වෘත්තීය සමිති නායකයින්ට ප්‍රහාර එල්ල කරලා, මඩ ගහලා මේ ඉල්ලීම් යටපත් කරන්න උත්සාහ කළා. නමුත් සාර්ථක වුණේ නැහැ. ඒ වගේම නැගෙනහිර පර්යන්තය විකිණීමට උත්සාහ කළ වෙලාවෙත් මිනිස්සු අවදි වුණා. මේවා නිසා ආණ්ඩුවට අඩියක් පස්සට ගන්න වෙලා තියෙනවා. විශ්‍රාමිකයන්ගේ පඩියෙන් මුදලක් අය කරන්න උත්සාහ කළා. ඒක දැන් අකුළ ගත්තා. විරෝධතා නිසා මේවා අකුළ ගන්නමා. නමුත් ඒකෙන් මේ ආණ්ඩුව හරි මඟට ගියා කියන එක අදහස් වෙන්නේ නැහැ. වැඩකරන පන්තිය නැගිටින විට මේවා අකුළ ගන්න වෙනවා. අකුළ ගන්න සිද්ධ වෙන දේ නොකර සිටීමටි ආණ්ඩුව කළ යුත්තේ. ගුරුවරුන්ගේ වැටුප් ප්‍රශ්නය විසඳන බව කියමින් බලයට පැමිණි ආණ්ඩුවක් වෘත්තීය සමිති කියනකං ඒ පොරොන්දු ඉෂ්ඨ නොකර ඉන්න අවශ්‍ය නැහැ.
අරගලයෙන් තොර ජයග්‍රහණයක් නොමැති බව වෘත්තීය සමිති දන්නවා. වෘත්තීය සමිති තමන්ගේ ශක්තිය සහ යුතුකම තේරුම් ගනිමින් ජාතික සම්පත් විකිණීමට විරුද්ධව නැගී සිටිය යුතු කාලය පැමිණ තියෙනවා.
